Në një sallë gjyqi të mbushur plot me familjarë të grave të vrarë, ka nisur gjykimi ndaj vrasësit serik nga Staro Nagoriçani, Trajçe Bojkovski, i cili përgjigjet për 4 vrasje dhe dy tentativa vrasjeje. Ai u soll në sallë nën shoqërimin e forcave të policisë dhe që nga momenti i hyrjes ka qëndruar në heshtje, duke parë lart.
I akuzuari refuzoi t’u përgjigjej pyetjeve të gjyqtarit për të dhënat e tij personale dhe nuk hidhte shikimin nga trupi gjykues, por vazhdonte të buzëqeshte dhe të vështronte tavanin e sallës.
Të afërmit e viktimave komentuan se ai po shtiret si i çmendur. Më parë, ai i është nënshtruar ekspertizës psikiatrike, ku psikiatrit kanë konstatuar se ai është i vetëdijshëm dhe mendërisht i aftë (i përgjegjshëm para ligjit). Më pas vijoi një pauzë e kërkuar nga Gjykata, për të verifikuar nëse ai është në gjendje ta ndjekë procesin gjyqësor.
T.B. (25 vjeç) nga Staro Nagoriçani akuzohet për 4 vepra penale – Vrasje nga neni 123, paragrafi 2, pika 4 e Kodit Penal, si dhe për dy tentativa vrasjeje të të njëjtës formë të kualifikuar.
Duke qenë se ai ka privuar nga jeta me paramendim disa persona, sipas nenit 123, paragrafi 3 të Kodit Penal, ai rrezikon një dënim me burg prej të paktën 10 vjetësh ose me burgim të përjetshëm.
Hetimi për vrasësin nga Staro Nagoriçani vërtetoi se ai ishte i vetëdijshëm kur i kreu vrasjet, ndërsa vriste nga urrejtja ndaj grave. Gjatë hetimit u zhvarrosën trupat e tri grave, ku obduksioni përcaktoi se dy prej tyre ishin viktima të tij.
Ky është rasti i parë i një vrasësi serik me elemente të femicidit – të gjitha viktimat ishin gra dhe u sulmuan pikërisht për shkak të gjinisë së tyre. I dyshuari është 25 vjeç dhe është banor i fshatit Malotino (Komuna e Staro Nagoriçanit).
Lëndën në procedurën gjyqësore do ta përfaqësojë Ljubomir Lape, prokuror publik në Prokurorinë Themele Publiko të Kumanovës.
U shqetësua nga prania e kamerave dhe e publikut
Gjyqtari konstatoi se i akuzuari nuk është në gjendje t’u përgjigjet pyetjeve të gjykatës dhe nuk është aspak komunikues, prandaj dha pauzë për të verifikuar nëse ekziston mundësia për të vazhduar gjykimin. Bojkovski deklaroi se u shqetësua nga prania e kamerave dhe e publikut, ndërsa pasi u qetësua, seanca kryesore vazhdoi.
Në fjalën e tij hyrëse, prokurori Ljubomir Lape tha se motivet e vrasjeve janë nekrofilia, pasi i akuzuari, pasi i vriste gratë e moshuara dhe të pambrojtura, i përdhunonte ato.
