Serumet me vitaminë C janë ndër produktet më të njohura në skincare, të promovuara gjerësisht për “ndriçimin” e lëkurës dhe reduktimin e njollave të errëta. Por çfarë thonë realisht studimet shkencore? Dermatologët dhe kërkimet klinike tregojnë se vitamina C (sidomos forma L-ascorbic acid) ka disa efekte të provuara në lëkurë.
Ajo është një antioksidant i fuqishëm që ndihmon në neutralizimin e dëmtimeve të shkaktuara nga rrezet UV dhe ndotja. Kjo do të thotë se ndihmon në parandalimin e plakjes së parakohshme dhe humbjes së shkëlqimit natyral të lëkurës. Një nga përfitimet më të studiuara është roli i vitaminës C në sintezën e kolagjenit.
Kolagjeni është proteina që i jep lëkurës elasticitet dhe qëndrueshmëri. Me përdorim të rregullt, serumet me vitaminë C mund të ndihmojnë në përmirësimin e teksturës së lëkurës dhe në reduktimin e vijave të imta.
Sa i përket “ndriçimit” të lëkurës, studimet tregojnë se vitamina C mund të ndihmojë në zbehjen e hiperpigmentimit, si njollat nga dielli ose shenjat e akneve.
