Dënimi i këngëtares iraniane Parastu Ahmadi dhe tetë anëtarëve të ekipit të saj muzikor dhe të prodhimit me 74 goditje me kamzhik ka shkaktuar reagime të forta në Iran dhe jashtë tij.
Vendimi vjen pas një koncerti të transmetuar drejtpërdrejt në YouTube, ku artistja u shfaq pa hixhab, duke sfiduar rregullat e rrepta të vendosura nga autoritetet iraniane.
Sipas dokumenteve të gjykatës të cituara nga organizatat për të drejtat e njeriut dhe avokatët e çështjes, gjykata penale në provincën Qom vendosi jo vetëm dënimin me kamzhik, por edhe ndalimin për dy vjet të largimit nga Irani si dhe ndalimin për dy vjet të ushtrimit të aktiviteteve artistike për të gjithë të dënuarit.
Autoritetet iraniane i akuzuan të pandehurit për “fyerje të modestisë publike” dhe për prodhimin e publikimin në internet të asaj që e cilësuan si “përmbajtje imorale dhe të turpshme”.
Çështja lidhet me një koncert të zhvilluar në dhjetor të vitit 2024, i cili u transmetua drejtpërdrejt në kanalin e Ahmadit në YouTube. Këngëtarja 29-vjeçare interpretoi këngën patriotike “Az Khoone Javanane Vatan” (“Nga gjaku i të rinjve të atdheut”) pa mbajtur hixhab. Videoja u përhap me shpejtësi në rrjetet sociale dhe mblodhi miliona shikime, duke e kthyer performancën në një simbol të kundërshtimit ndaj kufizimeve që u imponohen grave në Iran.
Menjëherë pas publikimit të videos, Ahmadi dhe disa nga muzikantët që morën pjesë në koncert u arrestuan nga autoritetet. Ata u liruan më vonë, por hetimet gjyqësore vazhduan dhe përfunduan me vendimin e fundit të gjykatës.
Dënimi ka shkaktuar reagime të ashpra nga organizatat ndërkombëtare për të drejtat e njeriut. Bahar Ghadehari, drejtoreshë e avokimit në Qendrën për të Drejtat e Njeriut në Iran, e cilësoi vendimin si dëshmi se situata e të drejtave të njeriut në vend mbetet e pandryshuar.
“Dënimi i Parastu Ahmadi me 74 goditje me kamzhik për këndim dhe paraqitje pa hixhab tregon hendekun e madh mes imazhit që regjimi përpiqet të paraqesë dhe realitetit që përjetojnë qytetarët”, deklaroi ajo.
Edhe avokati i të drejtave të njeriut, Moin Khazaeli, kundërshtoi vendimin, duke argumentuar se ai nuk mbështetet në ligjin penal iranian. Sipas tij, as këndimi dhe as prodhimi i veprave muzikore nga gratë nuk përbëjnë vepër penale sipas legjislacionit në fuqi.
Khazaeli theksoi gjithashtu se dënimi me kamzhik konsiderohet nga shumë organizata ndërkombëtare si një formë torture dhe trajtimi çnjerëzor, duke ngritur pikëpyetje serioze mbi respektimin nga Irani të detyrimeve ndërkombëtare në fushën e të drejtave të njeriut.
Rasti i Parastu Ahmadit ka nxitur reagime të shumta si brenda Iranit ashtu edhe në diasporën iraniane. Artistë, aktivistë dhe mbrojtës të të drejtave të njeriut e kanë cilësuar vendimin si një përshkallëzim të represionit kulturor dhe një përpjekje për të frikësuar ata që sfidojnë normat e ashpra shoqërore të vendosura nga regjimi iranian.
