Një incident i papritur ka tronditur ambientin te Santos, ku protagonisti kryesor ishte Neymar. Ylli brazilian raportohet se ka pasur një përplasje fizike me bashkëlojtarin 18-vjeçar Robinho Jr gjatë një seance stërvitore.
Fillimisht pati shtyrje mes lojtarëve, përpara se Neymar të akuzohej se e goditi me shuplakë dhe e pengoi të riun. Si pasojë, të dy futbollistët u larguan nga stërvitja. Ngjarja ndodhi gjatë një seance me ekipin rezervë, pasi të dy lojtarët kishin mbetur jashtë listës për ndeshjen ndaj Palmeiras, përpara sfidës së Copa Sudamericana kundër ekipit paraguajan Recoleta.
Ndërkohë, babai i të riut, Robinho, dikur një nga yjet më të mëdhenj të futbollit brazilian dhe ish-lojtar i Real Madrid dhe Manchester City, aktualisht po vuan një dënim me burg, një çështje që ka rikthyer shpesh vëmendjen e mediave. Pavarësisht incidentit, te Santos shpresojnë që situata të mbetet e izoluar dhe të mos ndikojë në harmoninë e skuadrës.
