Jeruzalem, Kryeministri Edi Rama mikpritet me ceremoni në Knesset “Plaza”
Kryeministri Edi Rama u kprit sot, gjatë vizitës së tij në Izrael, nga Kryetari i Knessetit (Parlamentit të Izraelit) Amir Ohana në Knesset Plaza me një ceremoni të posaçme.
Më pas, Rama dhe bashkëshortja e tij Linda Rama, bënë homazhe në Monumentin e ushtarëve të rënë dhe në Monumentin e viktimave të terrorit, si dhe la shënimin e tij në Librin e përshtypjeve në Hollin Shagal.
“Nuk mund të mendoj një nder më të madh dhe një bekim më domethënës sesa të lë këtë shënim në këtë faqe, si një mysafir i veçantë në këtë shtëpi legjendare. Faleminderit!” – shkroi Kryeministri Rama.
Ceremonia i parapriu takimit të Ramës me Kryetarin e Knessetit Amir Ohana, që më pas do të vijojë me adresimin e Kryeministrit Rama në Knesset, sipas një protokolli të posaçëm që Knesseti u ka rezervuar një numri të kufizuar udhëheqësish të huaj dhe së fundmi Presidentit të SHBA, Donald J. Trump.
