Dita e sotme u gjallërua nga një pamje mbresëlënëse, teksa dhjetëra kalorës parakaluan nëpër rrugët kryesore të qytetit me rastin e 28 Nëntorit, Ditës së Flamurit dhe Ditës së Pavarësisë së Shqipërisë. Marshimi tradicional, i cili tashmë është shndërruar në një simbol të festimeve në qytet, mblodhi dhjetra qytetarë që dolën për të përshëndetur dhe fotografuar momentin.
Kalorësit, të veshur me veshje kombëtare dhe të pajisur me flamuj kuqezi, krijuan një atmosferë festive dhe emocionuese. Parakalimi nisi nga lagjet periferike të Tetovës dhe vazhdoi drejt qendrës së qytetit, ku u prit me duartrokitje nga banorët.
Organizatorët theksuan se kjo ngjarje ka për qëllim të promovojë traditën shqiptare dhe të ruajë elementët e kulturës që lidhen me identitetin kombëtar. Sipas tyre, marshimi i kalorësve është një mënyrë për të kujtuar historinë, rezistencën dhe rrugëtimin e shqiptarëve drejt lirisë.
Manifestimet për 28 Nëntorin në Tetovë vazhdojnë edhe me aktivitete të tjera kulturore dhe patriotike gjatë mbrëmjes.
