Tensionet midis Barcelonës dhe portierit gjerman Marc-Andre ter Stegen vazhdojnë. Barcelona ka kohë që përpiqet të heqë qafe portierin gjerman, pasi solli Joan Garcia-n për ta zëvendësuar atë dhe kontrata e Wojciech Szczesny-t u rinovua.
Pavarësisht presionit nga klubi, Ter Stegen refuzoi të largohej nga Barcelona, dhe tani me lëvizjen e tij të fundit ai e ka përkeqësuar edhe më tej situatën.
Në një deklaratë zyrtare në lidhje me operacionin e ardhshëm, Ter Stegen tha se do të mungojë për tre muaj. Ky informacion është thelbësor sepse, sipas rregullave të La Ligës, një dëmtim nuk konsiderohet afatgjatë nëse rikuperimi është më i shkurtër se katër muaj, transmeton GazetaBlic Sport.
Prandaj, Barcelona nuk mund ta përjashtojë pagën e tij të lartë nga buxheti në mënyrë që të përmbushë rregullat e fair play-t financiar.
Sipas informacioneve nga mediat spanjolle, shërbimi mjekësor i klubit ka një vlerësim të ndryshëm. Ata besojnë se rikuperimi, duke pasur parasysh faktin se bëhet fjalë për një dëmtim të përsëritur në një zonë që tashmë i është nënshtruar një ndërhyrjeje kirurgjikale, do të zgjasë midis katër dhe pesë muajve.
Ky njoftim tregon se portieri është në “luftë” me klubin, shkruan në Spanjë. Nëse rikuperimi i Ter Stegen pritet të zgjasë katër muaj, klubi mund të përdorë 80% të pagës së tij, një nga më të lartat në ekip, për të regjistruar nënshkrimet e reja Joan Garcia dhe Marcus Rashford.
E gjithë kjo e ka vënë Barcelonën në një situatë të pazakontë. Aktualisht, portieri i vetëm i disponueshëm për ndeshjen e parë të sezonit kundër Mallorcas më 16 gusht është Inaki Peña.
Portierët Joan Garcia dhe Wojciech Szczesny ende nuk kanë nënshkruar kontrata për shkak të mungesës së buxhetit të pagave të klubit, duke e detyruar trajnerin Hansi Flick ta marrë Peñan në një turne aziatik dhe ta shtyjë përkohësisht largimin e tij të planifikuar nga klubi.
