Racin.mk reagon ndaj sjelljes dhe komunikimit publik të drejtorit të sapoemëruar të Agjencisë Kombëtare për Programe Arsimore Evropiane dhe Mobilitet, Petar Bogojeski, dhe i vlerëson ato si të papërshtatshme dhe në kundërshtim me kodin etik të funksionarëve të zgjedhur dhe të emëruar publikë në lidhje me komunikimin me mediat, transmeton Portalb.mk.
Në kundërshtim të plotë me standardet dhe parimet etike për komunikim me publikun, Petar Bogojeski vazhdoi me komunikim të papërshtatshëm në rrjetet sociale, një praktikë që e kishte edhe kur ishte funksionar partiak.
Bogojeski është njohur prej kohësh për deklaratat e tij shoviniste, termat fyese, gjuhën e urrejtjes dhe dezinformimin.
“Ky lloj komunikimi është veçanërisht intensivisht i drejtuar drejt disa mediave, gazetarëve, organizatave të shoqërisë civile dhe aktivistëve qytetarë. E konsiderojmë të nevojshëm këtë reagim sepse është tashmë një praktikë e rregullt që Petar Bogojeski, tani si drejtor i Agjencisë Kombëtare për Programe Arsimore Evropiane dhe Mobilitet (AKPAEM), të shkruajë komente në rrjetet sociale në portalin Racin.mk me përmbajtje fyese për mediumin dhe redaktorët dhe gazetarët e kësaj redaksie. Këto komente publikohen më shpesh gjatë orarit të punës, prandaj është për t’u habitur që ai gjen kohë pikërisht atëherë për t’u marrë me gazetarët dhe përmbajtjen e tyre mediatike nga pozicioni i tij si drejtor i AKPAEM”, thonë nga Racin.
Ata shtojnë se e vetmja mënyrë që kjo sjellje mund të shpjegohet është se ajo po ushtron presion mbi median dhe lirinë e shprehjes gazetareske. Përveçse është i papërshtatshëm, vazhdimësia që ruan i bën ato të perceptohen si agresive.
“Aq më tepër që bëhet fjalë për komente mbi përmbajtjen mediatike që nuk lidhen në asnjë mënyrë me të, pozicionin e tij apo AKPAEM-in. Disa prej tyre mund t’i shihni edhe këtu. Në një nga komentet, Bogojeski shkroi: “Dhe imagjinoni sikur ta propozonte shefi juaj Artançe Grubi? Kush e di se çfarë lëvdatash do t’i kishit dhënë racin.izmeqari.smk. Bogojeski qartë ose nuk ka mësuar asgjë, ose refuzon të mësojë nga paralajmërimet e mëparshme dhe madje edhe nga sanksionet për sjelljen e tij. Dihet se tre vjet më parë ai u shkarkua nga pozicioni i tij si këshilltar shtetëror në Ministrinë e Mbrojtjes për shkak të sjelljes në kundërshtim me Kodin e Etikës për punonjësit në ministri”, thuhet në reagim.
Ata kujtojnë se lidhur me komunikimin e papërshtatshëm të Bogojeskit, Rrjeti për Mbrojtje nga Diskriminimi kërkoi tërheqjen e vendimit për emërimin e Petar Bogojeskit si Drejtor të Agjencisë Kombëtare për Programe Arsimore Evropiane dhe Mobilitet, për shkak të deklaratave të tij me gjuhë shqetësuese, fyerjeve dhe gjuhës së urrejtjes, si dhe veprimeve që janë në kundërshtim me vlerat evropiane.
Do të kujtojmë edhe qëndrimin e Delegacionit të BE-së (DBE) në vendin tonë, i cili, në përgjigje të një pyetjes nga stafi i redaksisë Portalb.mk, nga Delegacioni deklarouan se kanë vënë në dukje, siç thonë ata, “shqetësimet e rëndësishme të Komisionit Evropian në lidhje me disa nga aktivitetet dhe deklaratat e tij publike”.
“Presim që Drejtori i një Agjencie Nacionale që menaxhon një program kyç të BE-së të mbështesë vlerat themelore të BE-së, të cilat përfshijnë respektimin e dinjitetit dhe të drejtave të njeriut, lirinë, demokracinë, barazinë dhe sundimin e ligjit, ne do diskutojmë këto çështje edhe me Ministrinë e Arsimit”, porositën nga delegacioni i BE-së në Shkup.
Lidhur me të gjitha këto, që lidhen me sjelljen e Petar Bogojeskit, drejtor i Agjencisë Kombëtare për Programe Arsimore Evropiane dhe Mobilitet, redaksia e Racin.mk i dërgoi letër Qeverisë së Maqedonisë së Veriut dhe ministrit të Qeverisjes së Mirë me disa pyetje për të cilat presin përgjigje.
“Ne dërguam letra në lidhje me reagimin dhe përmbajtjen e tij te Shoqata e Gazetarëve të Maqedonisë, Këshilli i Etikës në Media në Maqedoni, Sindikata e Gazetarëve të Maqedonisë, si dhe te Delegacioni i BE-së në vendin tonë”, thonë nga Racin.
Kujtojmë se, ardhja e Bogojeskit në krye të ANPAEM u cilësua nga opinioni si skandaloze për faktin se qëndrimet e tij nuk përkojnë me qëllimet e institucionit ku ai është emëruar. Partitë opozitare shqiptare e vlerësuan si “provokim në dëm të bashkëjetesës dhe perspektivës evropiane”, ndërkaq koalicioni shqiptar në pushtet VLEN nuk e cilësoi si shqetësim emërimin e Bogojeskit për drejtor.
