Shefi i Grupit Parlamentar të Aleancës për Ardhmërinë e Kosovës, Besnik Tahiri, ka kërkuar nga pushteti që të merren me minatorët që janë pa paga, raporton Gazeta Online Reporteri.net.
Në një postim në rrjetin social Facebook, Tahiri u ka reaguar krerëve shtetërorë që po qëndrojnë në Francë për Lojërat Olimpike, duke u thënë se boll u shëtitët në Paris.
“U shëtitët boll, edhe foto e video bëtë në Paris, tash a po merreni me minatorët e Trepçës që janë pa rroga, me bllokadat e rrugëve gjithandej Kosovës, me pensionistët që po presin pas katër vjet qeverie me ua rritë pensionet me dëmet ekonomike e me bllokadën ndërkombëtare”, shkroi ai.
Tutje, ai ka shtuar “punoni najsen të hajrit, e jo veç me kontrata njëburimore e korruptive! Se di për besë çka do të folni në fushatë”.
Ndryshe, Sindikata e Pavarur e Minatorëve të Trepçës kanë thënë se minatorët nuk kanë marrë ende as pagën e muajit qershor.
Në një reagim publik, nga Sindikata thonë se interesimi për fatin e minierës dhe minatorëve nga Qeveria dhe Bordi i Ndërmarrjes, janë në nivelin zero, teksa janë shprehur se ata kanë vetëm fjalë boshe.
Minatorët pohojnë se një qasje e tillë, përbën shqetësim serioz dhe sfidë që kërkon zgjidhje të menjëhereshme.
