Kryetari i Kuvendit të Maqedonisë, Afrim Gashi, pas thirrjes së djeshme të deputetit Hristijan Mickoski për të kërkuar falje për deklaratën “Kosova është atdheu im”, mëngjesin e sotëm përmes një komunikate për media dhe status në Facebook ka sqaruar: “Maqedonia e Veriut është atdheu im, kurse Kosova. është vendlindja ime apo vendlindja e prindërve të mi dhe e respektoj si të tillë për hir të tyre”.
Gashi thotë se disa media e kanë deformuar deklaratën e tij dhe se mund të bëhet fjalë për tërheqje të vëmendjes.
“Si kryetar i Kuvendit të të gjithë qytetarëve të Republikës së Maqedonisë së Veriut, dua të sqaroj se Afrim Gashi ka lindur në Shkup, ku jeton dhe punon me familjen e tij dhe vendlindja e tij është Maqedonia e Veriut.
Për ta sqaruar opinionin, deklarata e saktë në intervistën time ishte se “Kosova është vendlindja apo atdheu i prindërve të mi dhe e respektoj si të tillë për hir të tyre”.
Megjithatë, besoj se ne e kuptojmë njëri-tjetrin aq mirë sa të mos kërkojmë shpjegime të hollësishme të termave si vendlindja, atdheu ose mëmëdheu, pasi shqipja përdor edhe një emër të përbërë që bashkon nënë dhe atdhe. Për mua më e rëndësishmja është të tregojmë me veprimet tona se si e shohim vendin tonë, cili është angazhimi ynë ndaj tij, cilat janë kontributet tona dhe të bëjmë dallimin mes atyre që e ndërtojnë dhe e pasurojnë dhe atyre që e shkatërrojnë dhe e vjedhin.
Qytetarët nuk përfitojnë nga pretendimet dhe deklaratat për patriotizëm dhe ne nuk jemi këtu për të garuar se kush është më patriot. Nuk më pëlqejnë debatet e tilla dhe kjo është deklarata ime përfundimtare për këtë temë”, thotë Gashi.
