Ernest Muçi debutoi me fanellën e Besiktas teksa trajneri i turqve, Fernando Santos i dhuroi një fanellë titullari në transfertën ndaj Kayserispor, ndeshje që përfundoi me shifrat 0-0. Sulmuesi i kombëtares qëndroi në fushë për 90 minuta dhe ishte protagonist kryesor i Besiktas teksa krijoi disa raste të rrezikshme.
Në pjesën e parë, në minutën e 28, Muçi tentoi portën nga një kënd i vështirë, por portieri i skuadrës kundërshtare devijoi topin. Tre minuta para fundit të pjesës së parë, 23-vjeçari tentoi me të majtën nga distanca, por në këtë rast nuk e gjeti kuadratin.
Në fraksionin e dytë, Muçi tentoi të kalonte disa kundërshtarë dhe në fakt ia doli me sukses, teksa në fund goditja e tij drejt portës u ndal nga mbrojtësit kundërshtarë. Në vijimin e pjesës së dytë, Muçi “shkpiku” një pasim për Cenk Tosun, por sulmuesi ishte në pozicion jashtë loje.
Si përfundim, sfida nuk dhuroi fitues, por me Muçin që dha sinjale pozitive sidomos kur bëhet fjalë vetëm për ndeshjen e parë me gjigandët e Besiktas.
