Qelizat kancerogjene mund të hyjnë në një gjendje të ngjashme me “zombit” për t’i shpëtuar efekteve shkatërruese të kimioterapisë. Ky mekanizëm, i zbuluar nga studiuesit e Trinity College Dublin, mund të hapë rrugën për trajtime më efektive kundër kancerit.
Ekipi zbuloi se disa qeliza tumorale, në vend që të vdesin pas kimioterapisë, kalojnë në një gjendje të quajtur plakje e parakohshme qelizore. Në këtë fazë, ato nuk shumohen, por pësojnë ndryshime që mund të nxisin sistemin imunitar të ndihmojë në rikuperimin e tumorit.
Normalisht, sistemi imunitar ndihmon në riparimin e indeve të dëmtuara, duke nxitur prodhimin e qelizave të reja dhe krijimin e enëve të gjakut që furnizojnë zonën me oksigjen dhe lëndë ushqyese. Megjithatë, tumoret mund ta shfrytëzojnë këtë proces, duke u paraqitur si inde të dëmtuara dhe duke nxitur organizmin t’i mbështesë në vend që t’i shkatërrojë.
Studiuesit identifikuan rolin e proteinave të quajtura IAP, të cilat ndihmojnë qelizat tumorale t’u mbijetojnë barnave të kimioterapisë. Këto proteina neutralizojnë mekanizmat që normalisht shkaktojnë vdekjen e qelizave të dëmtuara.
Sipas profesorit Seamus Martin, qelizat që hyjnë në gjendjen e plakjes së parakohshme mund të bëhen deri në dhjetë herë më të mëdha se qelizat normale dhe të prodhojnë më shumë substanca inflamatore, duke tërhequr qelizat e sistemit imunitar.
Studimi, i publikuar në revistën Science Advances, tregoi gjithashtu se këto qeliza varen nga proteinat IAP për të mbijetuar. Përbërjet që bllokojnë këto proteina, të njohura si antagonistë të IAP, arritën të aktivizojnë mekanizmin e vetëshkatërrimit të qelizave dhe t’i eliminonin ato.
Shkencëtarët shpresojnë se këto gjetje do të ndihmojnë në zhvillimin e trajtimeve që kombinojnë kimioterapinë me barna që neutralizojnë proteinat IAP. Kjo mund të pengojë tumoret t’i shpëtojnë trajtimit dhe të rrisë numrin e qelizave kancerogjene që shkatërrohen. Megjithatë, nevojiten studime të mëtejshme për të përcaktuar se si mund të zbatohet kjo qasje te pacientët.
