Takimi i fundit i Komisionit të Përbashkët Multidisiplinar të Ekspertëve për Çështjet Historike dhe Arsimore ndërmjet Bullgarisë dhe Maqedonisë së Veriut, i mbajtur më 5 dhe 6 nëntor në Shkup, ka përfunduar pa rezultate, njofton agjencia bullgare e lajmeve BTA.
Përfaqësuesit bullgarë sërish nuk kanë arritur marrëveshje me kolegët e tyre nga Maqedonia e Veriut për mënyrën e paraqitjes së Kryepeshkopatës së Ohrit në tekstet shkollore të historisë. Ndërkohë, propozimi për shënimin e përbashkët të përvjetorit të vdekjes së Dame Gruevit është pritur në heshtje nga pala maqedonase.
Kjo paraqitet si një tjetër dëshmi e thellimit të stagnimit në punën e këtij mekanizmi, i cili ishte krijuar me qëllim tejkalimin e mospajtimeve historike dhe ndërtimin e marrëdhënieve të fqinjësisë së mirë ndërmjet dy vendeve, vlerëson mediumi hungarez.
Gjatë takimit, pala bullgare ka propozuar sërish shënimin e përbashkët të Dame Gruevit. Në dhjetor të vitit 2026 shënohen 120 vjet nga vdekja e revolucionarit, i cili konsiderohet figurë e rëndësishme si në historinë e Bullgarisë, ashtu edhe në atë të Maqedonisë. Megjithatë, sipas të njëjtit burim, iniciativa nuk ka marrë përgjigje nga përfaqësuesit maqedonas.
Në vend të kësaj, pala maqedonase ka prezantuar një tekst të përgatitur më herët për shënimin e përbashkët të rezistencës kundër antisemitizmit, fashizmit dhe nacional-socializmit, e cila nisi në të dy vendet në vitin 1941.
Përfaqësuesit bullgarë e kanë refuzuar këtë propozim, duke argumentuar se kjo rezistencë shënohet në të gjithë Evropën dhe se nuk duhet të kufizohet në një iniciativë dypalëshe, ndërsa puna e komisionit vazhdon të përqendrohet në çështjet e pazgjidhura që lidhen me shekullin XI.
Ky ishte takimi i pestë i komisionit gjatë vitit 2026. Gjatë tij, historianët bullgarë kanë rikujtuar edhe një herë pritjet e Parlamentit Evropian dhe Komisionit Evropian për arritjen e rezultateve të qarta dhe konkrete.
Edhe në raportin e Komisionit Evropian theksohet se ndërmjet shtatorit 2025 dhe marsit 2026 janë mbajtur katër takime, pa u arritur rezultate konkrete.
Takimi i ardhshëm i komisionit është caktuar të mbahet në fillim të dhjetorit në Sofje.
