Grupa e deputetëve të VMRO-DPMNE-së, sot në Kuvend ka dorëzuar nënshkrimet nga iniciativa për sjelljen e ligjit për anulimin e ligjit për regjistrim, informon Zhurnal.
Ata kërkojnë që Qeveria të ndalojë procedurën për regjistrim sepse sipas tyre, gjithkund në botë regjistrimet janë shtyrë për në vitin 2022.
“Apelojmë deri tek qeveria të ndalojë me procedurën për regjistrim sepse gjithkund në Europë dhe botë, regjistrimet janë shtyrë për në vitin 2022. Thërrasim Qeverinë të heqë dorë dhe të shtyjë regjistrimin për vitin 2022, të shkruajnë vërejtje në tekst të ligjit dhe të përmirësojnë që të mund të kemi regjistrim siç i duhet shtetit tonë për zhvillim, sepse teksti aktual i ligjit për regjistrim nuk do të sjellë asgjë më ndryshe nga ajo që e kemi ne si shtetas në Republikën e Maqedonisë”, theksoi deputeti Gjorgjija Sajkoski nga radhët e VMRO-dPMNE-së.
VMRO-DPMNE siç tha Sajkoski, disa herë ka bërë me dije se ligji është i dëmshëm dhe nuk do të paraqesë gjendjen reale të banorëve në Maqedoni të Veriut.
“Për këtë shkak, përmes Kuvendit kemi dorëzuar mbi katërdhjetë amandamente thelbësore me të cilat duhet të përmirësohet teksti i ligjit. Për fat të keq, të gjitha amandamentet u refuzuan”, tha Sajkoski.
