Vëllezërit Bakaj, më saktësisht Roberto dhe Amarildo, kanë ruajtur rekordin e tyre të pamposhtur në boks, duke shënuar fitore kundër kolumbianit Brayan Santander dhe italianit Francesco Morand.
Boksieri shqiptar Roberto Bakaj regjistroi një tjetër fitore të rëndësishme në karrierën e tij profesionale, duke mposhtur boksierin kolumbian Brayan Santander në një ndeshje të zhvilluar në BBC Arena në Zvicër.
Me këtë triumf, Bakaj konfirmoi formën e tij të shkëlqyer dhe ruajti një rekord profesional të përsosur: 16 ndeshje, 16 fitore.
Në një atmosferë të nxehtë dhe kundër një kundërshtari të fortë, Bakaj u shfaq i përqendruar, i disiplinuar dhe dominues në ring. Që nga raundet e para, boksieri shqiptar demonstroi qartë superioritetin e tij teknik dhe fizik, duke kontrolluar ritmin e ndeshjes dhe duke i lënë kundërshtarit të tij pak hapësirë për t’u përgjigjur.
Kjo fitore e fundit nuk është vetëm një arritje personale për Bakajn, por edhe një moment tjetër krenarie për sportin shqiptar.
Me çdo ndeshje, ai vazhdon të forcojë pozicionin e tij në boksin profesional, duke dëshmuar se është një pretendent serioz me ambicie të mëdha dhe potencial për të shkëlqyer në skenën ndërkombëtare.
Me vendim të gjyqtarëve, Amarildo regjistroi fitoren e 15-të në karrierën e tij, në po aq ndeshje. Pas ndeshjes, vetë Morandi e përgëzoi duke e ngritur lart para tifozëve.
