Presidenti i Shteteve të Bashkuara, Donald Trump, ka zbutur tonet ndaj kryeministres italiane Giorgia Meloni, duke e cilësuar atë një “person shumë të mirë”, megjithëse përsëriti kritikat për qëndrimin e saj ndaj konfliktit në Lindjen e Mesme.
Duke folur para gazetarëve në Ankara, përpara nisjes së samitit të NATO-s, Trump iu përgjigj një pyetjeje për raportet me Melonin.
“Ajo është një person shumë i mirë. E dua shumë, por mendoj se bëri një gabim. Ajo thjesht nuk ishte aty për ne dhe kjo nuk më pëlqeu”, u shpreh presidenti amerikan, duke iu referuar refuzimit të Italisë për të mbështetur sulmin amerikano-izraelit ndaj Iranit.
Deklaratat vijnë pas përplasjes së fortë mes dy liderëve gjatë javëve të fundit. Të dielën, Trump publikoi në platformën e tij Truth Social një imazh të manipuluar të Giorgia Melonit, të shoqëruar me mesazhin “Nevojiten masa kufizuese”, ndërsa autoritetet italiane zgjodhën të mos reagojnë publikisht ndaj postimit.
Më herët, presidenti amerikan kishte deklaruar se Meloni “nuk po shkon mirë në Itali” dhe se po humbiste mbështetjen e qytetarëve. Ai kishte pretenduar gjithashtu se kryeministrja italiane i kishte kërkuar të bënin një fotografi së bashku gjatë samitit të G7.
Pavarësisht tensioneve të fundit, Giorgia Meloni konsiderohej deri pak kohë më parë një nga aleatet më të afërta të Donald Trump në Evropë.
Ndërkohë, ministri italian i Mbrojtjes, Guido Crosetto, i cili shoqëron Melonin në samitin e NATO-s në Ankara, deklaroi se prioritet mbetet ruajtja e marrëdhënieve transatlantike, pavarësisht mosmarrëveshjeve të fundit mes Romës dhe Uashingtonit.
Samiti i NATO-s pritet të shërbejë si mundësi për kontakte të reja mes liderëve të Aleancës, ndërsa vëmendja mbetet e përqendruar te zhvillimet në Ukrainë, Lindjen e Mesme dhe marrëdhëniet mes aleatëve.
