Australiani Kaden Groves (Alpecin-Deceuninck) ka triumfuar në etapën e 20-të të Tour de France 2025, duke befasuar favoritët në një ditë të projektuar për klasikët, por që përfundoi në duart e një sprinteri të shkëlqyer.
Groves, pjesë e një arratisjeje të hershme dhe shumë të luftuar, mbërriti i pari në finish pas një shpërthimi vendimtar në kilometrat e fundit, duke lënë pas me 54 sekonda holandezin Frank van den Broek (Team Picnic PostNL) dhe me 59 sekonda Pascal Eenkhoorn (Soudal Quick-Step). Italiani më i mirë ishte Simone Velasco (XDS Astana Team), që u rendit i katërti.
Etapa nisi me përpjekje të shumta për të formuar një grup arratisjeje, derisa në ngjitjen Côte de Valfin u krijua grupi përfundimtar me 12 çiklistë, mes tyre edhe emra si Tim Wellens, Matteo Trentin, Frank van den Broek, Simone Velasco dhe vetë Groves. Grupi u nda më tej në Côte de Thesy, ku fillimisht Jordan Jegat tentoi një sulm të vetëm, por u kap dhe u tejkalua nga bashkëkombasi i Groves, Harry Sweeny.
Gjithsesi, edhe ai nuk mundi të rezistonte gjatë, pasi në Côte de Longeville grupi pësoi përçarje të reja, shoqëruar edhe nga një rrëzim që nxori jashtë gare Ivan Romeo-n dhe Romain Gregoire. Ishte pikërisht aty që Groves shfrytëzoi momentin e duhur për t’u shkëputur përfundimisht dhe për të siguruar fitoren e tij të parë në Tour de France.
Në renditjen e përgjithshme, Tadej Pogacar (UAE Team Emirates) ruan vendin e parë me 4 minuta e 24 sekonda epërsi ndaj Jonas Vingegaard (Team Visma | Lease a Bike), ndërsa Florian Lipowitz (Red Bull-Bora-Hansgrohe) mbetet i treti. Të dielën zhvillohet etapa përmbyllëse, ajo tradicionale drejt Champs-Élysées në Paris.
