TikTok akuzohet për shkelje të të drejtave të përdoruesve europianë

Disa shoqata të konsumatorëve në Europë kanë bërë një ankesë kundër TikTok lidhur me përdorimin e të dhënave nga platforma. Organizata Europiane e Konsumatorit (BEUC) njoftoi ankesën duke akuzuar rrjetin social për shfrytëzimin e të drejtave dhe të dhënave të përdoruesve të rinj.

Organizata gjithashtu u ka kërkuar autoriteteve në 15 vende europiane që të hetojnë sjelljen e TikTok më tej. Pas një hetimi disa mujor, u zbulua se platforma popullore kishte kushte “të paqarta” të shërbimit, tha BEUC.

“Kushtet e të drejtës së kopjimit janë të padrejta pasi ato i japin TikTok një të drejtë të pakthyeshme për të përdorur, shpërndarë dhe riprodhuar videot e botuara nga përdoruesit, pa shpërblim.”

TikTok gjithashtu po përballet me një vëzhgim mbi një tipar që i lejon përdoruesit të blejnë monedha si “dhurata” virtuale për influencers në internet. BEUC tha se politika e platformës për këtë veçori përmban “kushte të padrejta dhe praktika mashtruese”, duke pasur parasysh që TikTok ka aftësinë të ndryshojë kursin e këmbimit në internet midis monedhave dhe “dhuratave”.

Kjo potencialisht “anon transaksionin financiar në favor të vet,” tha BEUC.

TikTok është përballur me presion nga autoritetet italiane të mbrojtjes së të dhënave për të bllokuar përdoruesit e mitur nga përdorimi i aplikacionit. BEUC gjithashtu ka akuzuar TikTok për “dështim në kujdesin e duhur kur bëhet fjalë për mbrojtjen e fëmijëve” në internet.

“Në vetëm pak vite, TikTok është bërë një nga aplikacionet më të njohura të mediave sociale me miliona përdorues në të gjithë Europën, por TikTok po shkel të drejtat e përdoruesve në një masë të madhe. Fëmijët e duan TikTok, por kompania nuk mbron ata. Ne nuk duam që të vegjëlit tanë të ekspozohen ndaj reklamave të fshehura dhe pa dijeni të shndërrohen në tabela kur ata thjesht përpiqen të argëtohen,” tha Monique Goyens, Drejtoresha e Përgjithshme e BEUC.

Në një deklaratë për Euronews, TikTok tha se ka bërë ndryshime për të siguruar që politikat e privatësisë mund të kuptoheshin nga përdoruesit e rinj.

“Garantimi i sigurisë së komunitetit tonë, veçanërisht i përdoruesve të rinj, dhe respektimi i ligjeve në fuqi ku veprojmë janë përgjegjësi që i marrim me shumë seriozitet. Ne jemi të përkushtuar për të mbrojtur komunitetin tonë në baza ditore dhe kemi ndërmarrë iniciativa të rëndësishme të tilla si ndryshimi i të gjitha cilësimeve të paracaktuar të privatësisë për përdoruesit nën moshën 16 vjeç duke i bërë këto profile private,” tha një zëdhënës.

TikTok u shpreh se ka kontaktuar Organizatën Europiane të Konsumatorit për të organizuar një takim dhe për të adresuar shqetësimet./TechCrunch