Pas dy barazimeve, Newcastle u rikthye te suksesi në kampionat teksa mposhti me rezultatin 1-0 Fulham. Por, triumfi erdhi me kosto të lartë për trajnerin Eddie Howe duke qenë se Bruno Guimaraes pësoi një dëmtim në pjesën e parë.
Në fakt, braziliani e luajti pjesën e parë i dëmtuar dhe tekniku Howe u shpreh pas ndeshjes se gaboi që nuk e zëvendësoi më herët lojtari ndërsa në klub u frikësuan për më të keqen, këputjen e ligamentit çka do të kuptonte përfundimin e sezonit para kohe. Mirëpo, testet paraprake kanë qetësuar ambientin e klubit anglez pasi mesa duket bëhet fjalë për thjesht një dëmtim që mund të kërkojë deri në disa javë rikuperim.
Guimares në këtë formë pritet të humbasë ndeshjet e Carabao Cup ndaj Southampton e më pas mund të kuptohet më qartë në momentin kur do të rikthehet në fushë. Këtë sezon, 25-vjeçari është shndërruar në një nga lojtarët kryesorë të Newcastle duke koleksionuar 16 ndeshje, në të cilat ka shënuar tre dhe ka asistuar po tre herë.
