Arben Taravari, ish-ministër i Shëndetësisë dhe lider i Aleancës për Shqiptarët, ishte mysafir në shortkastin e IMA “Interkultura” me Robert Alagjozovski. Ata u ndalën te arsyet e largimit nga koalicioni qeveritar, gjendja e të drejtave të komuniteteve, kohezioni shoqëror, marrëdhëniet ndëretnike dhe ndërkulturore, si dhe bllokimi i integrimeve evropiane dhe pritshmëritë nga koalicioni qeveritar.
Taravari flet edhe për marrëdhëniet ndërkulturore në nivel lokal, veçanërisht në Gostivar, si dhe për angazhimet programore që do të dominojnë në zgjedhjet lokale të ardhshme.
Ai theksoi se, edhe pse marrëdhëniet ndëretnike nuk ishin arsyeja e drejtpërdrejtë, ato janë një nga arsyet për largimin nga koalicioni qeveritar. Vlerësimi për gjendjen e kohezionit shoqëror nuk është i ndritshëm, dhe këtë ai nuk e paraqet si mendim personal, por si një realitet objektiv që ndanë shumëkush.
“Për të qenë krejtësisht i sinqertë, kjo nuk është arsyeja e drejtpërdrejtë, por është një nga arsyet – po, kjo është e vërtetë. Pra, u hoq balancuesi, dhe kishim një marrëveshje, ne, katër partitë e VLEN-it së bashku me kryeministrin, kishim një ligj të përgatitur nga Aleanca për Shqiptarët për përfaqësim të drejtë për të gjithë – jo vetëm për komunitetet etnike, por edhe për të gjithë kategoritë e ndryshme të qytetarëve që jetojnë këtu. Ideja ishte që diku në dhjetor ai të miratohej si ligj. Por kaloi… ne thoshim se për një javë, për dy javë, do të ishte gati, kaloi janari, shkurti, marsi, prilli, tani jemi në fund të majit dhe ligji ende nuk është askund. Dhe, për fat të keq, kemi pasur kritika të mëdha, madje filluan të na tallin për këtë, duke na thënë – thatë se do të bëhej për dy-tre javë, ja kanë kaluar pesë-gjashtë muaj, jo dy-tre javë,” – theksoi Taravari.
Ai nuk e fsheh krenarinë që vjen nga një vend si Gostivari, të cilin e konsideron si model për mënyrën si duhet të rregullohen marrëdhëniet ndëretnike në nivel lokal dhe në të gjithë vendin, por mendon se qytetarët meritojnë avancim të të drejtave të tyre.
“Jam shumë krenar që vij nga një qytet që është një model për funksionimin e të gjitha komuniteteve etnike që jetojnë – pra Gostivari, dhe atje turqit, shqiptarët, maqedonasit, romët – jetojnë si vëllezër. Flamuri maqedonas, shqiptar, turk, madje edhe ai rom, unë si kryetar komune e kam vendosur. Jam shumë krenar që i gjithë shteti mund ta marrë si shembull për funksionim të mirë. Për fat të keq, vitin e fundit nuk krijohet ai përshtypje. Nuk e them këtë unë. Nëse e them unë, kjo është subjektive. Por në përgjithësi, ku do që të shkosh, cilëndo institucion që ta vizitosh, dhe t’i pyesësh njerëzit – përshtypja është se ka një lloj përçarjeje, si të donte dikush të dominonte, si të mos funksiononte shteti siç duhet. Nuk them vetëm për shqiptarët apo maqedonasit – kjo është përshtypje e shumicës së komuniteteve etnike që jetojnë në Maqedoni, gjë që nuk është e mirë për shtetin tonë, të mos kemi kohezion të mirë mes të gjithë neve që jetojmë këtu,” – theksoi Taravari.
Edhe pse Taravari mendon se komuniteti maqedonas ka të drejtë të plotë të vendosë për çështjet e identitetit, ai inkurajon kryeministrin Mickoski të gjejë mënyrë për ta mbyllur këtë çështje dhe të vazhdojnë negociatat me BE-në, që do të çonin në përmirësimin e mirëqenies së të gjithë qytetarëve të Maqedonisë.
“Ajo që ndodhi, propozimi francez, u përdor nga VMRO për të parë se si të fitojë më shumë votues dhe përkrahës. Unë vazhdoj të mendoj se maqedonasit kanë të drejtë ekskluzive për të vendosur për këtë, për të ardhmen e tyre, për atë marrëveshje… e cila është propozuar nga Franca, por praktikisht është një marrëveshje mes Maqedonisë dhe Bashkimit Evropian. Tani, si do të ecë përpara, nuk e di. Por shoh se si të jenë bllokuar gjërat. Dhe nëse flisni me diplomatë të ndryshëm nga Bashkimi Evropian, përshtypja është se Maqedonia tashmë është ndarë nga Shqipëria, që nuk është e mirë për shtetin tonë. Unë do të doja që bashkë ta vazhdojmë dhe bashkë ta përfundojmë rrugën drejt BE-së dhe sa më shpejt të bëhemi pjesë e saj. Por ajo që po ndodh realisht, nuk është ashtu siç dëshirojmë të gjithë. Por, sërish them, vendimi duhet të jetë ekskluziv i maqedonasve, sepse ka të bëjë më shumë me interesin e tyre. Por ne, si komunitete të tjera etnike që jetojmë këtu, duhet t’i inkurajojmë, sepse interesi është më i madh – që Maqedonia të jetë pjesë e BE-së dhe sa më pak njerëz të na largohen nga shteti,” – mendon Taravari.
Taravari nuk e la pa komentuar as efektet e qëndrimit nacionalist të partnerit më të madh në pushtet:
“Sidomos mes shqiptarëve, përshtypja është sikur jemi në komunizëm, kur kishte disa shqiptarë në pushtet që ishin të dëgjueshëm ndaj regjimit komunist të atëhershëm, ishin servilë, rrinin aty, nuk flisnin asgjë apo nuk këmbëngulnin për të drejtat e të tjerëve që jetojnë në shtet. Por sërish dua të them se është shumë e rëndësishme që ne bëmë një hap, që dolëm nga qeveria për të dhënë një alarm, një sinjal, që – ej, le të përpiqemi, të zgjohemi, se ndër të tjera, i rëndësishëm është edhe bashkëjetesa mes nesh që jetojmë këtu, rruga drejt BE-së, decentralizimi – që ishin platformë e përbashkët me VMRO-DPMNE-në, e cila është partia më e madhe absolutisht në bllokun maqedonas, dominon, por kur bashkëpunon me dikë nuk është me rëndësi kush është më i madh, por është e rëndësishme partneriteti. Pra, hyn në qeveri si partner, për të ndihmuar, për t’i ndihmuar njëri-tjetrit. Por mbi të gjitha – për t’u ndihmuar qytetarëve, që ata të shohin një shpresë në shtet, se vërtet po ecim në rrugën më të mirë për të gjithë që jetojmë në këtë shtet,” – theksoi Taravari.
