Kuvendi i Degës së BDI-së në Gostivar nuk u karakterizua vetëm nga zhvillimet politike, por edhe nga një moment i veçantë artistik dhe emocional. Gjatë aktivitetit, lideri i BDI-së, Ali Ahmeti, mori si dhuratë një pikturë të realizuar nga talentja e re e artit figurativ, Amina Selimi.
Vepra paraqet dy nga simbolet më të njohura të Gostivarit – Sahat Kullën dhe Xhaminë e Sahatit – të punuara me kujdes dhe ndjeshmëri artistike, duke përcjellë trashëgiminë historike dhe identitetin kulturor të qytetit.
Ky gjest u prit me duartrokitje nga të pranishmit dhe i dha një dimension tjetër kuvendit, duke dëshmuar se arti mbetet një urë që bashkon brezat dhe vlerat e një komuniteti.
Për Amina Selimin, dhurimi i kësaj pikture përbën një vlerësim të talentit të saj, ndërsa për të pranishmit ishte një kujtesë se të rinjtë vazhdojnë ta promovojnë Gostivarin përmes krijimtarisë dhe artit.
