“Izraeli e inicioi atë, Izraeli e kreu atë dhe Izraeli merr përgjegjësinë e plotë”, thuhet në një deklaratë.
Izraeli kreu sulmin ndaj udhëheqësve të lartë të Hamasit në kryeqytetin e Katarit Doha. Ndërkohë, u bë publike edhe deklarata e plotë mbi sulmin nga Forcat e Mbrojtjes së Izraelit (IDF), ku thuhej se:
“IDF dhe ISA kryen një sulm të saktë duke shënjestruar udhëheqjen e lartë të organizatës terroriste Hamas.
“Për vite me radhë, këta anëtarë të udhëheqjes së Hamasit kanë udhëhequr operacionet e organizatës terroriste, janë drejtpërdrejt përgjegjës për masakrën brutale të 7 tetorit dhe kanë orkestruar dhe menaxhuar luftën kundër shtetit të Izraelit.
“Para sulmit, u morën masa për të zbutur dëmin e civilëve, duke përfshirë përdorimin e municioneve të sakta dhe inteligjencës shtesë.
“IDF dhe ISA do të vazhdojnë të veprojnë me vendosmëri për të mposhtur organizatën terroriste Hamas përgjegjëse për masakrën e 7 tetorit”, thuhet në deklaratë.
Çfarë ndodhi?
Izraeli bombardoi disa zona në Doha dhe tha se objektivi ishin zyrtarë të lartë të Hamasit. “Para sulmit, u morën masa për të zbutur dëmin ndaj civilëve, duke përfshirë përdorimin e municioneve të sakta dhe inteligjencës shtesë”, tha ushtria në një deklaratë.
Reagimi i Katarit
Shteti i Katarit ka dënuar me ashpërsi sulmin izraelit që goditi ndërtesa banimi në kryeqytetin Doha, ku ndodheshin disa anëtarë të Byrosë Politike të Hamasit. Në një deklaratë zyrtare të shpërndarë në rrjetin social X, zëdhënësi i Ministrisë së Jashtme të Katarit, Majed Al Ansari, e cilësoi këtë akt si një “sulm kriminal të turpshëm” dhe një shkelje flagrante të të gjitha ligjeve dhe normave ndërkombëtare.
Al Ansari theksoi se sulmi përbën një kërcënim serioz për sigurinë dhe jetën e qytetarëve të Katarit, si dhe të rezidentëve të huaj në vend. Ai konfirmoi se forcat e sigurisë, mbrojtja civile dhe autoritetet përkatëse reaguan menjëherë për të menaxhuar pasojat dhe për të garantuar sigurinë e banorëve dhe zonave përreth.
“Katari nuk do të tolerojë sjelljen e papërgjegjshme të Izraelit, as cenimin e sigurisë dhe sovranitetit të tij. Ky akt përbën një rrezik të madh për stabilitetin rajonal”, thuhet në deklaratë.
