Tre marinarë indianë të raportuar fillimisht si të zhdukur janë konfirmuar të vdekur pas sulmit të ushtrisë amerikane ndaj një anijeje cisternë pranë brigjeve të Omanit.
Ngjarja ndodhi pasi ushtria amerikane njoftoi se kishte goditur me “municione precize” dhomën e motorëve të anijes cisternë M/T Settebello, me flamur të Palaut. Sipas Komandës Qendrore të SHBA-së, anija po transportonte naftë iraniane dhe po përpiqej të thyente bllokadën detare amerikane ndaj porteve iraniane.
Sipas autoriteteve amerikane, ekuipazhi ishte paralajmëruar përpara ndërhyrjes ushtarake. Ministria e Jashtme e Indisë deklaroi një ditë më parë se tre shtetas indianë rezultonin të zhdukur pas sulmit, ndërsa 21 anëtarë të tjerë të ekuipazhit u shpëtuan. Në reagimin e saj zyrtar, Nju Delhi nuk përmendi ushtrinë amerikane dhe as pretendimet për shkeljen e bllokadës.
M/T Settebello është anija e tetë tregtare që, sipas autoriteteve amerikane, është neutralizuar nga forcat e SHBA-së në ujërat pranë Iranit që nga përshkallëzimi i tensioneve në rajon.
Ngjarja pritet të shtojë presionin diplomatik mbi konfliktin në Lindjen e Mesme, ndërsa India po ndjek nga afër zhvillimet dhe hetimet për rrethanat e incidentit.
