Pas punonjësve të Drejtorisë së të Ardhurave Publike dhe të administratës së gjyqësorit, tani protesta dhe mbyllje të pikave kufitare paralajmërojnë punonjësit e Drejtorisë së Doganave. Në rast se nuk ka reagim nga institucionet kompetente për kërkesën e tyre, që është pagesa e shtesave në paga prej 30%, të premten do të dalin në protestë. Thonë se me vite nuk e kanë marrë atë që u takon sipas ligjit dhe marrëveshjes Kolektive.
“Kemi parë që ministri i Financave ka siguruar rritje pagash prej 30% në Ministrinë e Financave dhe në institucionet e tjera, por edhe pse punonjësit e Doganës kanë të drejtë në këtë shtesë, nuk e kanë marrë kurrë. Për këtë arsye vendosëm që të premten nga ora 12 deri në 12:30 të bëjmë protestë paralajmëruese, që të kërkojmë pagesën e shtesave në paga për punonjësit në Drejtorinë e Doganave, të cilët e mbushin buxhetin me më shumë se 51% çdo vit.”- deklaroi Tërpe Deanoski, kryetar i sindikatës SPAODSHQ
Institucionet e lartpërmendura janë në pritje të një vendimi nga ministri i Financave, Fatmir Besimi. Ai, nga ana tjetër, u tha se është në proces negociatash një marrëveshje e përgjithshme kolektive, e cila do të mundësojë rritje të vazhdueshme dhe të qëndrueshme të pagave dhe se nuk ka vend për zgjidhje të veçanta para se të nënshkruhet. Mirëpo kur mund të ndodh e njëjta dhe a do të pritet deri në rebalancin e buxhetit, ose në buxhetin e vitit të ardhshëm, nuk ka përgjigje të prerë.
Po punohet në nënshkrimin e një marrëveshjeje kolektive të përgjithshme e cila do të vlente njëjtë për të gjithë të punësuarit në sektorin publik. Atje kemi definuar procesin dhe po zhvillohen negociata dhe presim që të pajtohemi në lidhje me qëndrimet.”- deklaroi Fatmir Besimi, Ministër I Financave.
Dje pakënaqësi shprehën edhe punonjësit e administratës gjyqësore dhe të drejtorisë së të Ardhurave Publike dhe kërcënuan me grevë të përgjithshme.
