Shqipëria do të hapë edhe 20 qendra të tjera pritjeje për migrantët në tre rajone strategjike

Qeveria e Shqipërisë ka miratuar zyrtarisht Planin Kombëtar të Emergjencave për flukset e përziera migratore për periudhën 2026–2028, një dokument strategjik që synon të përgatisë institucionet shqiptare për t’u përballur me rritjen e flukseve migratore në territorin e vendit.

Vendimi është marrë në bazë të nenit 100 të Kushtetutës, me propozim të ministrit të Brendshëm. Zbatimi i tij i është besuar Ministrisë së Brendshme, Ministrisë së Shëndetësisë, Ministrisë së Arsimit, strukturave të emergjencave civile si dhe institucioneve të tjera shtetërore.

– Qendrat e pritjes nuk do të ndërtohen të përqendruara në një qytet të vetëm, por do të shpërndahen sipas hartës së flukseve migratore dhe pikave kryesore të kalimit. Konkretisht, ato do të vendosen në rajonet juglindore dhe jugore kufitare, kryesisht në Korçë, Gjirokastër dhe Vlorë, raportojnë mediat.

Sipas dokumentit, në Shqipëri parashikohet ngritja e qendrave të pritjes për migrantë nga Afganistani, Pakistani, Irani, Siria, Libani dhe Gaza, të cilët përdorin Shqipërinë dhe Serbinë si korridor tranziti drejt Greqisë.

– “Për të mbështetur pushtetin vendor të Shqipërisë, në një periudhë kur fenomenet migratore po marrin përmasa gjithnjë e më të mëdha dhe po ndikojnë në dimensionet sociale, ekonomike, politike dhe kulturore të shumë vendeve, Shqipëria, si vend i Ballkanit Perëndimor, nuk përjashtohet nga këto zhvillime,” shkruajnë mediat.

Dokumenti thekson se synimi është përgatitja e të gjitha institucioneve dhe strukturave qendrore dhe lokale për të menaxhuar me sukses krizën e flukseve të përziera migratore, për të cilat pritet rritje në kufijtë dhe territorin e Shqipërisë.

Po ashtu, dokumenti parashikon sigurimin e plotësimit të kërkesave të migrantëve për zhvendosje, evakuim, komunikim, akomodim të menjëhershëm, ndihmë ushqimore, kujdes shëndetësor dhe mbështetje psikologjike e psikosociale.

Sipas autoriteteve shqiptare, politika kombëtare e migracionit ka për qëllim menaxhimin e flukseve migratore dhe garantimin e të drejtave të migrantëve.

“Plani Kombëtar hyn në fuqi pas publikimit në Fletoren Zyrtare dhe do të shërbejë si bazë ligjore për të gjitha veprimet në terren për menaxhimin e migracionit. Për shkak të pozicionit gjeografik, Shqipëria është pjesë e rrugës ballkanike të migracionit, që përfshin Turqinë, Greqinë, Shqipërinë, Serbinë, dhe më pas Evropën Qendrore”, thuhet në dokument.

Vlerësohet se konfliktet në Lindjen e Mesme, situata e pasigurisë në Afganistan dhe destabiliteti në disa vende të Azisë dhe Afrikës kanë rritur ndjeshëm flukset migratore në këtë korridor.

Në Shqipëri, në qarkun Lezhë, ekziston tashmë një qendër pritjeje në qytetin port Shëngjin dhe një kamp akomodimi në Gjadër, të krijuara në bazë të marrëveshjes me Italinë. Edhe pas dy vitesh nga ndërtimi, këto qendra nuk kanë funksionuar për shkak të vendimeve të gjykatës në Romë. Megjithatë, kryeministrja e Italisë, Giorgia Meloni, nuk është tërhequr nga synimi dhe së fundmi ka deklaruar se ato shumë shpejt do të fillojnë nga funksionimi.