Irani ka shqyrtuar mundësinë e goditjes së një porti detar në Ukrainë si kundërpërgjigje ndaj sulmit ukrainas ndaj një anijeje tregtare iraniane në Detin Kaspik. Megjithatë, një valë kontaktesh diplomatike ka ulur përkohësisht tensionet, raportojnë zyrtarë iranianë dhe perëndimorë.
Sipas burimeve, Ukraina goditi të shtunën një anije iraniane të transportit në Detin Kaspik, duke shkaktuar vdekjen e një marinari civil. Pas incidentit, autoritetet iraniane premtuan se do të reagonin.
Disa burime të informuara mbi të dhënat e inteligjencës thanë se Irani po shqyrtonte lëshimin e një rakete balistike me një kokë luftarake të vogël drejt Ukrainës, si një veprim simbolik që do të shkaktonte dëme të kufizuara. Zyrtarë të tjerë vlerësuan se objektivi i mundshëm do të ishte një nga portet ukrainase në Detin e Zi.
Një sulm i tillë do të përbënte një përshkallëzim të madh të konfliktit dhe do të rriste rrezikun e zgjerimit të luftës, duke pasur parasysh marrëdhëniet e tensionuara mes Ukrainës dhe Iranit, si edhe aleancën ushtarake të Teheranit me Rusinë.
Ndërhyrja e diplomacisë – Burime iraniane thanë se Teherani shpresonte që konflikti të mbyllej me një kundërpërgjigje të kufizuar, ndërsa zyrtarë perëndimorë paralajmëruan se ishte e vështirë të parashikohej reagimi i Ukrainës.
Të dielën, ministri i Jashtëm i Iranit, Abbas Araghchi, e cilësoi sulmin ukrainas si shkelje të Kartës së Kombeve të Bashkuara dhe deklaroi se incidenti “nuk mund të mbetet pa përgjigje”.
Megjithatë, të martën, pas përpjekjeve diplomatike të Kievit, Araghchi zhvilloi një bisedë telefonike me homologun e tij ukrainas, Andrii Sybiha.
Sipas ministrit iranian, pala ukrainase e përshkroi goditjen ndaj anijes si të paqëllimshme. Araghchi deklaroi se Irani nuk kërkon përshkallëzim të mëtejshëm, por theksoi se çdo sulm ndaj qytetarëve apo interesave iraniane është i papranueshëm dhe se pret kompensim për dëmet e shkaktuara.
Ministri iranian bëri të ditur gjithashtu se ka biseduar edhe me përfaqësuesen e lartë të Bashkimit Evropian për Politikën e Jashtme, Kaja Kallas, për mënyrat e uljes së tensioneve në rajon.
Frika për një front të ri – Analisti iranian Mehdi Rahmati, i afërt me qeverinë e Teheranit, tha se brenda Iranit ka mendime të ndryshme për mënyrën e reagimit.
“Ukraina nuk është një vend i vogël apo i parëndësishëm. Ka përvojë në luftë dhe mbështetje logjistike nga Shtetet e Bashkuara dhe Evropa. Nuk do të fitonim asgjë duke hapur një front të ri”, u shpreh ai.
Ndërkohë, presidenti ukrainas Volodymyr Zelensky ndodhej në Uashington për një takim me presidentin amerikan Donald Trump dhe për të marrë pjesë në ceremoninë përkujtimore të senatorit Lindsey Graham.
Sipas autoriteteve ukrainase, Zelensky pritej t’i paraqiste administratës amerikane informacione të inteligjencës mbi mbështetjen që Rusia i ka dhënë Iranit gjatë konfliktit të tij me Shtetet e Bashkuara. Nga ana tjetër, Ukraina prej kohësh akuzon Rusinë për përdorimin e dronëve iranianë dhe komponentëve të tyre në sulmet kundër territorit ukrainas.
Situata mbetet e tensionuar, megjithëse kontaktet diplomatike të ditëve të fundit kanë shmangur, për momentin, një përshkallëzim të drejtpërdrejtë mes Teheranit dhe Kievit.
