Robotë humanoidë për policinë dhe jo vetëm, Kina futet fuqishëm në garë

Divizioni i robotikës i prodhuesit më të madh kinez të automjeteve për eksport, Chery Automobile, po përgatitet për një ofertë publike fillestare (IPO), me synimin për të siguruar financim për investime të reja dhe zgjerimin e aktivitetit.

Lajmi është bërë i ditur nga Zhang Guibing, drejtues i biznesit dhe president i Chery International, i cili tha për Reuters se AiMOGA Robotics është aktualisht në diskutime për tregjet e mundshme ku mund të realizohet listimi. Ai nuk dha detaje mbi kohën apo bursën ku mund të zhvillohet IPO-ja.

Sipas Zhang, një listim në bursë do t’i mundësonte kompanisë të siguronte kapital për zhvillimin e teknologjisë, ndërsa do të rriste edhe transparencën, qeverisjen dhe standardet e operimit

AiMOGA, e inkubuar nga Chery në janar 2025, ka shpërndarë mbi 3,000 robotë në tregjet globale, rreth 2,000 prej tyre jashtë Kinës. Kompania operon aktualisht në më shumë se 60 vende dhe rajone.

Një prej drejtimeve të reja të kompanisë janë robotët humanoidë për policinë. Më herët këtë vit, AiMOGA prezantoi robotë të tillë për menaxhimin e trafikut, orientimin e turmave dhe ndërgjegjësimin për sigurinë publike. Rreth 110 njësi janë vendosur tashmë në qytete të ndryshme kineze.

Sipas Zhang, menaxhimi i trafikut është konsideruar një fushë premtuese për përdorimin e robotëve, pasi punonjësit e policisë përballen me temperatura ekstreme, ndotje dhe rrezik të lartë aksidentesh. Kompania sheh gjithashtu potencial për përdorimin e tyre në tregjet e huaja, veçanërisht në Lindjen e Mesme dhe Azinë Juglindore.

Zhvillimi i robotikës humanoide në Kinë po përshpejtohet, ndërsa prodhuesit e automjeteve dhe kompanitë teknologjike po investojnë gjithnjë e më shumë në këtë sektor. Konkurrenca është krahasuar me atë të industrisë kineze të automjeteve elektrike në vitet e para të zhvillimit të saj.

Në të njëjtën kohë, interesi i investitorëve për robotikën është rritur ndjeshëm. Prodhuesi kinez Unitree shënoi një rritje të fortë në debutimin e tij në bursën e Shangait, ndërsa edhe kompani të tjera të sektorit po shqyrtojnë mundësinë e listimit në bursë.

Zhang paralajmëroi se konkurrenca, veçanërisht për kostot, pritet të jetë e fortë dhe se sektori mund të kalojë një proces konsolidimi në vitet e ardhshme.

AiMOGA po synon gjithashtu zgjerimin përtej tregut kinez, me robotët e shërbimit dhe robotët shoqërues që pritet të jenë ndër produktet kryesore për tregjet ndërkombëtare.

Për hyrjen e mundshme në SHBA, Zhang tha se ambicia e kompanisë është t’u shërbejë tregjeve globale, por zgjerimi do të kërkojë përshtatje me rregulloret dhe nevojat e ndryshme të konsumatorëve.

Sipas tij, robotëve humanoidë mund t’u duhen rreth 10 vite për të arritur një nivel të pjekurisë teknologjike që do të mundësonte përdorimin e tyre në shkallë të gjerë.