Paris Saint-Germain është futur seriozisht në garë për transferimin e Rodrygo Goes nga Real Madridi. Trajneri Luis Enrique e sheh brazilianin si një përforcim të domosdoshëm për të forcuar repartin ofensiv të skuadrës.
Sipas mediave franceze, Enrique i ka kërkuar bordit që të lëvizë shpejt për të siguruar shërbimet e 24-vjeçarit, i cili nuk po gjen më hapësirat e njëjta te Real Madridi pas ndryshimeve në stol.
Rodrygo thuhet se është i gatshëm të largohet nga “Los Blancos” për të pasur më shumë minuta në fushë, pasi synon të jetë titullar i padiskutueshëm në Kupën e Botës 2026 me Brazilin.
PSG e sheh sulmuesin si lojtarin ideal për të plotësuar sistemin sulmues ku alternohen emra si Kvaratskhelia, Dembélé, Doué dhe Barcola. Fleksibiliteti i tij për të luajtur në çdo pozicion përpara e bën një aset të vyer.
Real Madridi ka vendosur një çmim prej 80 milionë eurosh për kartonin e tij, por PSG beson se mund të negociojë për një shumë më të ulët, sidomos nëse marrëveshja shtyhet pas përfundimit të Kupës së Botës për Klube.
Rodrygo ka kontratë me Realin deri në vitin 2028 dhe vlerësohet si një nga asetet më të rëndësishme të klubit, por konkurrenca në repartin ofensiv është ashpërsuar pas transferimeve të reja.
Ky mund të jetë një nga transferimet më të mëdha të kësaj vere në Evropë, me PSG-në që është gati të bëjë një ofertë të fuqishme për të bindur lojtarin dhe Real Madridin.
Në garë për lojtarin janë edhe klubet angleze si Arsenal, Man Utd e Newcastle United, por duket se tani kampioni i ri i Evropës është favoriti kryesor.
