Veteranët e luftës së Ushtrisë Çlirimtare të Kosovës kanë kërkuar nga presidentja Vjosa Osmani që të mos e dekretojë Ligjin për pagën minimale, kjo pasi që ata (veteranët) kanë mbetur jashtë këtij ligji.
Organizata e Veteranëve të UÇK-së ka kërkuar një takim me presidenten Vjosa Osmani që të mos lihen anash nga ky ligj.
Siç merr vesh Zeri.info, ky takim pritet të mbahet sot në orën 14:00, por një gjë e tillë nuk është konfirmuar zyrtarisht.
Nga Presidenca vetëm kanë konfirmuar për Zeri.info se takimi me veteranët do të mbahet sot.
“Presidentja Osmani do t’i takojë sot përfaqësuesit e OVL të UÇK-së”, ka thënë për “Zërin” Bekim Kupina, këshilltar për media.
Në seancën e 13 korrikut, Kuvendi i Kosovës ka miratuar Ligjin për pagën minimale me 60 vota për, një abstenim dhe asnjë votë kundër. Ligji parasheh rritjen e pagës minimale në 264 euro bruto ose 250 euro neto.
