Presidenti i zgjedhur i Kolumbisë, Abelardo de la Esperanza, ka njoftuar se do të zhvendosë ambasadën e vendit nga Tel Avivi në Jerusalem dhe do të rivendosë marrëdhëniet diplomatike me Izraelin, të cilat u ndërprenë nga qeveria në largim e Gustavo Petros.
Në një deklaratë, zyra e presidentit të zgjedhur bëri të ditur se Kolumbia do të hapë një ambasadë në Jerusalem, të cilin e cilëson si kryeqytetin e Izraelit, duke theksuar se marrëdhëniet historike mes dy vendeve do të forcohen sërish.
Petro reagoi ashpër ndaj njoftimit të pasardhësit të tij, duke e akuzuar atë se po bëhet “bashkëpunëtor në gjenocid” përmes afrimit me Izraelin.
Ndërkohë, ministri i Jashtëm i emëruar nga presidenti i zgjedhur, Omar Boula, zhvilloi një takim në Uashington me homologun izraelit Gideon Saar, ku të dyja palët ranë dakord për një plan për rivendosjen e plotë të marrëdhënieve dypalëshe dhe heqjen e regjimit të vizave.
Sipas zyrës së presidentit të zgjedhur, Kolumbia do të tërheqë gjithashtu mbështetjen për padinë e Afrikës së Jugut kundër Izraelit në Gjykatën Ndërkombëtare të Drejtësisë, ku Izraeli akuzohet për gjenocid në Rripin e Gazës.
Shumica e vendeve vazhdojnë t’i mbajnë ambasadat e tyre në Tel Aviv, pasi statusi i Jerusalemit mbetet një nga çështjet më të debatueshme në konfliktin izraelito-palestinez. Megjithatë, SHBA-ja e zhvendosi ambasadën e saj në Jerusalem në vitin 2018, pas vendimit të presidentit Donald Trump për ta njohur qytetin si kryeqytet të Izraelit.
