Ka përfunduar takimi mes Kryeministrit të Kosovës, Albin Kurti dhe të dërguarit të posaçëm të Bashkimit Evropian për Dialogun mes Kosovës dhe Serbisë, Miroslav Lajçak, si dhe ambasadorit të ShBA-së në Kosovë, Jeff Hovenier, shkruan Gazeta Online Reporteri.net.
Ky takim i cili zgjati afro dy orë, kishte temë diskutimi edhe 6 kushtet që Kurti ka bërë të ditura për themelimin e Asociacionit të komunave me shumicë serbe.
Ndërmjetësuesi i BE-së për Dialogun, Miroslav Lajçak ka ateruar në Prishtinë të hënën në mëngjes, ndërsa pritet që po sot të udhëtojë drejt Beogradit.
Para takimit me Lajçak dhe Hovenier, Kurti i shoqëruar nga zëvendëskryeministri Besnik Bislimi priti sot në ndërtesën e Qeverisë ambasadorët dhe diplomatët e akredituar të misioneve diplomatike në Kosovë.
Temë qendrore e diskutimit ishte procesi i dialogut, propozimi evropian dhe rruga përpara.
Kryeministri Kurti i njoftoi ata me qëndrimet e Qeverisë së Republikës së Kosovës përfshirë këtu edhe gjashtë pikat e prezantuara në Seancën e Kuvendit javën e kaluar në lidhje me marrëveshjen e Brukselit të vitit 2013.
