Ish-kryeministër, ish-ministër i Mbrojtjes, tanimë Ministër i Shtetit për Diasporën, për herë të parë pas 30 vitesh pjesë e Partisë Socialiste rizgjedhja për të shtatën herë si deputet i Pandeli Majkos, raporton Vizion Plus, është i kushtëzuar nga renditja i 19-ti në Tiranë.
Nuk ka dyshim se kur të vjetërit e socialistëve ngritën kartonin jeshil në parlament për të shkuar në zgjedhjet e 25 Prillit me lista pjesërisht të hapura nuk e kishin menduar se do të ishin pikërisht disa prej tyre, që do të liheshin jashtë fitores së sigurt të mandatit të deputetit.
PANDELI MAJKO
MINISTER SHTETI PER DIASPOREN
Pritshmëria ime ka vetëm një gjë tani, të punojë për fitoren e Partisë Socialiste. Nëse Partia Socialiste kalon ne opozitë, mandati im si deputet nuk do të kishte ndonjë vlerë të madhe. Po nuk punova për njerëzit e mijë nuk besojë se jam i aftë të punoj për veten time.
Pas pastrimit të parë të listës nga Edi Rama me lënien jashtë të disa socialistëve, ish ministra apo me mandat deputeti, shndërrimin e drejtuesve të qarqeve dhe politikanëve të karrierës, si vetë Pandeli Majkon, Fatmir Xhafën apo Mimi Kodhelin, në makineri prodhuese votash, Ministri i Diasporës thotë për Vizion Plus se është sakrifica për mandatin e tretë qeverisës.
PANDELI MAJKO
MINISTER SHTETI PER DIASPOREN
Nuk mund ta bënim duke qëndruar në krye të listës dhe duke vendosur disa të rinj të panjohur për elektoratin socialist duke iu thënë që tani votat do t’i mblidhni duke votuar për ta, ne të tjerët por rrimë dhe po ngrohemi në zjarrin e votave të atyre që do të jenë në vijën e zjarrit. Bën një diferencë me listat dhe mënyrën si do të mbledhë votat opozita.
Për 25 Prillin, shton Vizion Plus, Pandeli Majko e më së shumti shokët e tij të partisë kundërshtarët janë dy, ai brenda llojit dhe Partia Demokratike me aleatët e saj.
PANDELI MAJKO
MINISTER SHTETI PER DIASPOREN
Ka edhe me keq, po të shikoni listën e Partisë Demokratike, ata duhet të mbledhin vota edhe për kryetarët e partive të tjera. Sado luftë brenda llojit të ketë, votat do të shkojnë në drejtim të Partisë Socialiste dhe jo të ndonjë partie tjetër. Demokratët duhet të punojnë për të tjerët dhe pastaj për veten.
Nga Edi Rama i është kërkuar që të udhëheqë fushatën e 25 Prillit për Tiranën nën organizmin e drejtuesit politik, kryetarit të bashkisë, Erion Veliaj.
PANDELI MAJKO
MINISTER SHTETI PER DIASPOREN
Do të jem pak më i tërhequr pasi nëqoftëse unë do të bëjë fushatë në çdo njësi, ndiej që kam një lloj konklikti interesi pasi edhe unë jam kandidat.
Objektivi i socialistëve për Tiranën është 20 deputetë. Si rrezik mazhoranca nuk sheh opozitën e bashkuar, por votuesin e zhgënjyer.
PANDELI MAJKO
MINISTER SHTETI PER DIASPOREN
Ajo për të cilën po punojmë dhe që e shikojmë si problem janë njerëz të mpirë nga tetë vite në pushtet të PS-s apo të mbingarkuar nga ndonjë padrejtesi në marrëdhënie me administratën shqiptare. Po përpiqemi të jemi të kujdesshëm që për shkak të kësaj mërzie nuk është se ia japin votën opozitës por do të zgjedhin të mos votojnë. Nëqoftëse PS e rrezikon, nuk është opozita sado që ajo të bashkohet e të vendosi kryetarët e partive në vende të sigurta, është votuesi i mërzitur, le ta quajmë kështu, apo i paplotësuar nga vitet e qeverisjes socialiste, të zgjedhi mos të votojë, ky do të ishte rrezik potencial.
Deri në ditën e zgjedhjeve, parashikimi i Ministrit të Shtetit për Diasporën është një fushatë e egër, jo vetëm në ligjërime.
PANDELI MAJKO
MINISTER SHTETI PER DIASPOREN
Për një arsye shumë të thjeshtë, sepse kush do të fitojë do t’i marrë të gjitha, kush do t’i humbasë do t’i humbasë të gjitha.
Të vetmen gjë që nuk e ka parashikim, por të vendosur, shton Vizion Plus, është e ardhmja nëse nuk rikonfrimohet në karrigen e deputetit.
PANDELI MAJKO
MINISTER SHTETI PER DIASPOREN
Padyshim do të fillojë një jetë tjetër. Kam dy diploma, që besoj janë të mjaftueshme për të vazhduar përpara.
