Një raund i ri negociatash mes Iranit dhe Shteteve të Bashkuara pritet të nisë të premten në Zvicër, me synimin për të arritur një marrëveshje përfundimtare, ka bërë të ditur ministri i Jashtëm iranian Abbas Araghchi.
Duke folur në një takim me diplomatë të huaj, të transmetuar nga televizioni shtetëror iranian, Araghchi tha se aktivizimi formal i një memorandumi mirëkuptimi mes palëve do të ndodhë po të premten dhe se faza e parë e tij përfshin “shpalljen e përfundimit të luftës”.
Sipas tij, bisedimet do të zhvillohen në Zvicër dhe në fazën përfundimtare do të përqendrohen kryesisht në programin bërthamor të Teheranit.
Araghchi tha gjithashtu se marrëveshja ka një dimension më të gjerë rajonal, duke përfshirë edhe zhvillimet në Lindjen e Mesme. Ai paralajmëroi se çdo sulm i ri ndaj Libanit apo prani ushtarake e huaj në territorin libanez do të konsiderohej shkelje e marrëveshjes.
Ministri iranian theksoi se palët në marrëveshje, sipas Teheranit, janë Shtetet e Bashkuara dhe Izraeli nga njëra anë, dhe Irani dhe Hezbollahu nga ana tjetër, duke e përshkruar procesin si një përpjekje për ndalimin e konfliktit në disa fronte.
Ndërkohë, përmbajtja e plotë e memorandumit të mirëkuptimit nuk është bërë publike, ndërsa mbeten të paqarta detajet mbi angazhimet konkrete dhe rolin e aktorëve rajonalë në zbatimin e tij.
Detajet zyrtare pritet të bëhen publike pas ceremonisë së nënshkrimit në Zvicër.
