Së fundmi është vërejtur një rritje shqetësuese e numrit të rasteve të fëmijëve dhe të miturve që kërkojnë ndihmë mjekësore për shkak të komplikimeve shëndetësore të shkaktuara nga konsumimi i pijeve energjike. Këto pije, të cilat përmbajnë sasi të larta kafeine, sheqeri dhe substancash stimuluese, paraqesin rrezik serioz për organizmin në zhvillim të fëmijëve dhe adoleshentëve.
Mjekët dhe specialistët e shëndetit paralajmërojnë se konsumimi i shpeshtë i pijeve energjike mund të shkaktojë probleme kardiovaskulare, rritje të presionit të gjakut, çrregullime të ritmit të zemrës, pagjumësi, ankth, nervozizëm, si dhe probleme me përqendrimin dhe sjelljen. Në raste më të rënda janë raportuar edhe humbje të vetëdijes apo komplikime që kërkojnë trajtim urgjent spitalor.
Aktualisht shitja e pijeve energjike për fëmijët dhe të miturit nuk është e ndaluar me ligj, çka i bën ato lehtësisht të qasshme në markete, kioska dhe institucione arsimore përreth. Mungesa e një kornize ligjore rregulluese e vë në rrezik shëndetin e të rinjve dhe krijon hapësirë për abuzim, veçanërisht duke pasur parasysh marketingun agresiv që i drejtohet pikërisht kësaj grupmoshe.
Ndryshe nga RMV-ja, shumë vende të Bashkimit Evropian dhe të Ballkanit Perëndimor kanë ndërmarrë masa konkrete ligjore për të kufizuar ose ndaluar shitjen e pijeve energjike për personat nën 18 vjeç. Këto masa përfshijnë kufizime moshe, paralajmërime të detyrueshme shëndetësore në ambalazh, ndalimin e reklamimit për fëmijët dhe kontrolle më të rrepta në pikat e shitjes. Rezultatet e këtyre politikave kanë treguar ulje të ndjeshme të konsumit dhe përmirësim të shëndetit të përgjithshëm të fëmijëve.
Për këtë arsye, është e domosdoshme që institucionet përkatëse në vend të marrin masa urgjente për rregullimin ligjor të shitjes së pijeve energjike. Krahas ndalimeve ligjore, duhet të zhvillohen edhe fushata edukative për prindërit, mësuesit dhe vetë fëmijët, me qëllim rritjen e ndërgjegjësimit mbi rreziqet që këto produkte paraqesin.
Mbrojtja e shëndetit të fëmijëve është përgjegjësi shoqërore dhe institucionale. Vendosja e kufizimeve ligjore për shitjen e pijeve energjike nuk është kufizim i lirisë tregtare, por një hap i nevojshëm drejt një shoqërie më të shëndetshme dhe më të ndërgjegjshme për të ardhmen e saj.
Doktoresha Arlinda Rexhepi tha se, shumë shpesh përballemi me raste të fëmijëve që paraqiten në urgjencë për shkak të konsumimit të pijeve energjike. Organizmi i tyre nuk është i përgatitur për sasi të larta kafeine dhe stimuluesish.
“Para disa ditësh kisha një pacient në moshën 15-vjeçar, i cili kishte blerë pije energjike gjatë pushimit në shkollë. Gjatë orës mësimore, fëmija kishte përjetuar rrahje të shpejta të zemrës dhe marramendje, çka bëri të nevojshme ndërhyrjen mjekësore. Këto produkte nuk janë të padëmshme dhe kërkojnë rregullim urgjent ligjor për të mbrojtur shëndetin e të miturve”, tha ajo.
