Nuk e kuptoj motivin dhe nevojën për të përhapur (dezinformata) se uji i pijshëm që përdorin qytetarët e Shkupit është i ndotur me bakterien Esherihia koli. Nuk e di nëse ato mendje të sëmura e dinë se çfarë do të thotë një kontaminim i tillë, thotë toksikologu dhe profesor në Fakultetin e Mjekësisë në USHCM, dr. Andon Çibishev, në një postim në profilin e tij në Fejsbuk, pas panikut të djeshëm për sigurinë e ujit të pijshëm në Shkup.
Ai thotë se nëse do të kishte Esherihia koli në ujin e Shkupit, do të kishim mbi 50,000 pacientë brenda një ose dy ditësh.
“Nuk e di nëse ato mendje të sëmura e dinë se çfarë do të thotë një ndotje e tillë. Edhe pse bakteria Esherihia koli nuk shkakton simptoma dhe sëmundje tek të gjithë dhe në të gjitha rastet, mjafton që vetëm 10% e banorëve të Shkupit të zhvillojnë një pamje të inflamacionit të zorrëve, që do të thotë se brenda një ose dy ditësh do të ketë mbi 50,000 pacientë”, thekson Çibishev.
Mjeku thekson se kjo do të thotë një problem i madh për vendin dhe një kolaps të mundshëm të sistemit të kujdesit shëndetësor.
“MPB-ja është në lëvizje për të zbuluar urgjentisht porositësit, krijuesit dhe promovuesit e kësaj gënjeshtre të ndyrë që ka mbjellë mosbesim dhe frikë tek qytetarët e Shkupit. Pa mëshirë, pa selektivitet. Zoti na ndihmoftë! – thuhet në postimin e Çibishevit.
