Ndeshje dramatike, Man. United mposht Brightonin “pas vërshëllimës finale”
Spektakël, emocione dhe ankth deri në sekondën e fundit që Manchester United të merrte tre pikët e para në këtë sezon të Premier League. Pas disfatës në shtëpi ndaj Crystal Palace skuadra e Ole Gunnar Solskjaer triumfoi 2-3 në fushën e Brighton në ndeshjen hapëse të javës së 3-të të Premier League.
Një sukses i pamerituar për United që erdhi me një 11-metërsh atëherë kur kishte përfunduar gjithçka por ndërhyrja e VAR për një prekje me dorë brenda zone në aksionin e fundit bëri që gjyqtari të akordonte 11-metërsh për “Djajtë e Kuq” me Bruno Fernandes që realizoi golin e fitores për miqtë. Brighton ishte vërtet e pafat në këtë takim pasi goditi në plot 5 raste shtyllën dhe traversën.
Pas përpjekjeve të shumta Brighton arriti të zhbllokonte sfidën me penalltinë e kthyer në gol nga Maupay. Megjithatë United reagoi shpejt teksa në goditjen e parë në portë të Maguire, devijimi i Dunk rezultoi deçiziv në barazimin e rezultatin. Në fillimin e pjesës së dytë pasi iu anullua një gol për pozicion jashtë loje, United arriti të gjente epërsinë me Marcus Rashford falë një inkursioni personal.
Për të ardhur te minuta e 5-të shtesë që ishte me të vërtetë e pabesueshme. Fillimisht Brighton barazoi rezultatin me March ndërsa në asksionin pasardhës ku akordua penalltia që përloti lojtarët e Brighton dhe komentatorin e Supersport Ylli Aga, penallti që Bruno Fernandes e kthehu në gol dhe i dha 3 pikët e para Manchester United.
Vlen të theksohet se arbitri vërshëlleu për përfundimin e ndeshjes, por më pas u sinjalizua nga VAR-i për të rishikuar aksionin e fundit dhe pasi u konsultua me pamjet, akordoi penalltinë që i dha fitoren e parë Manchester United.
