Kryetari i Lidhjes Demokratike të Kosovës, Isa Mustafa ka thënë se nuk është i sigurt që qytetari është i informuar se çfarë paraqesin shallat e kuqe të lidhura në drunjtë e Prishtinës për të ardhmen e vendit.
Mustafa në një postim në rrjetin social Facebook shkruan se në qoftë se votohet vetëm me emocione, rrezikohet të vihen shallat e kuqe rreth qafe, të marshojnë si në Revolucionin Kulturor Kinez e të mbesim pa asnjë republikë!
Lexoni të plotë postimin:
“Të nderuar miq,
Vota është shprehje e vullnetit politik, e bindjeve por edhe e perceptimit.
Vota është vendimmarrje e qytetarit. Për të marrë vendim, element themelor është informata.
Nuk jam i sigurt se qytetari është i informuar se çfarë paraqesin shallat e kuqe të lidhura në drunjtë e Prishtinës, dhe jo vetëm aty, për të ardhmen e vendit. Çfarë është simbolika dhe mesazhi i marsheve në sheshet e qytetit tonë? Çfarë është Republika e Tretë?
Një shtet e bëmë me SHBA-të dhe me partnerët tanë evropian, të zotuar për demokracinë perëndimore. Ndërkaq, VV duhet ta qartësojë se kush janë partnerët e saj për Republikën e Tretë. Ndryshe, në qoftë se votohet vetëm me emocione, rrezikojmë të vejmë shallat e kuqe rreth qafe, të marshojmë si në Revolucionin Kulturor Kinez e të mbesim pa asnjë republikë!
