Hamasi sugjeroi të mërkurën se ishte i hapur për një marrëveshje armëpushimi me Izraelin, por nuk pranoi një propozim të mbështetur nga SHBA-të, të njoftuar nga Presidenti i SHBA-së Donald Trump disa orë më parë, duke këmbëngulur në qëndrimin e tij të kahershëm se çdo marrëveshje do t’i japë fund luftës në Gaza .
Trump tha të martën se Izraeli kishte rënë dakord për kushtet e një armëpushimi 60-ditor në Gaza dhe i kërkoi Hamasit ta pranonte marrëveshjen, përpara se kushtet të përkeqësoheshin. Udhëheqësi amerikan ka rritur presionin mbi qeverinë izraelite dhe Hamasin për të ndërmjetësuar një armëpushim dhe një marrëveshje për pengjet, si dhe për t’i dhënë fund luftës.
Trump tha se periudha 60-ditore do të përdoret për të punuar drejt përfundimit të luftës – diçka që Izraeli thotë se nuk do ta pranojë derisa Hamasi të mposhtet. Ai tha se një marrëveshje mund të arrihet që javën e ardhshme.
Por përgjigjja e Hamasit, e cila theksoi kërkesën e tij që lufta të mbaronte, ngriti pyetje nëse oferta e fundit mund të materializohej në një pauzë të vërtetë të luftimeve.
Zyrtari i Hamasit, Taher al-Nunu, tha se grupi militant ishte “i gatshëm dhe serioz në lidhje me arritjen e një marrëveshjeje”.
Ai tha se Hamasi ishte “i gatshëm të pranonte çdo iniciativë ,që çon qartë në përfundimin e plotë të luftës”.
Një delegacion i Hamasit pritet të takohet me ndërmjetësuesit egjiptianë dhe katarianë në Kajro të mërkurën për të diskutuar propozimin, sipas një zyrtari egjiptian. Zyrtari foli në kushte anonimiteti, sepse nuk ishte i autorizuar të diskutonte bisedimet me median.
Megjithatë, Trump e sheh momentin actual, si një pikë kthese të mundshme në konfliktin brutal që ka lënë më shumë se 56 mijë të vdekur në territorin palestinez. Ministria e Shëndetësisë e Gazës nuk bën dallim midis civilëve dhe luftëtarëve në numërimin e vdekjeve, por thotë se më shumë se gjysma e të vdekurve janë gra dhe fëmijë.
Lufta filloi më 7 tetor 2023, kur militantët e udhëhequr nga Hamasi sulmuan Izraelin jugor, duke vrarë 1,200 njerëz dhe duke marrë rreth 250 pengje.
Lufta e ka lënë territorin bregdetar palestinez në rrënoja, me pjesën më të madhe të peizazhit urban të rrafshuar nga luftimet. Më shumë se 90% e popullsisë prej 2.3 milionë banorësh të Gazës është zhvendosur, shpesh herë. Dhe lufta ka shkaktuar një krizë humanitare në Gaza, duke i shtyrë qindra mijëra njerëz drejt urisë./ AP.
