Negociatorët amerikanë vazhdojnë t’i kërkojnë Ukrainës që të heqë dorë nga pjesë të rajonit të Donbasit që aktualisht kontrollohen nga forcat e Kievit, deklaroi një zyrtar i lartë ukrainas.
Sipas tij, Uashingtoni po ushtron presion që këto territore t’i dorëzohen Moskës, ndonëse forcat ruse nuk kanë arritur t’i pushtojnë ato, edhe pas gati katër vitesh luftë që nga pushtimi rus në shkurt të vitit 2022.
“Putini kërkon territore. Amerikanët thonë se Ukraina ‘duhet të tërhiqet’, gjë që Kievi e refuzon. Është e çuditshme që SHBA po mban një qëndrim të ngjashëm me atë të Rusisë për këtë çështje”, tha zyrtari për AFP.
Ndërkohë, kancelari gjerman Friedrich Merz dhe liderë të tjerë europianë, të cilët pritet të takohen sot për të diskutuar mënyrat e përfundimit të luftës në Ukrainë, shprehin shqetësim se presidenti amerikan Donald Trump mund t’i imponojë Kievit kushtet e një marrëveshjeje paqeje.
Sipas burimeve diplomatike, ekziston frika se SHBA mund të “braktisë Ukrainën” dhe të përjashtojë Europën nga negociatat.
