Numri i pacientëve që kanë kërkuar ndihmë mjekësore për shkak të problemeve shëndetësore në Gostivar vazhdon të ulet, gjë që sipas Ministrisë së Shëndetësisë tregon stabilizimin e gjendjes epidemiologjike. Gjatë ditës së djeshme, në institucionet shëndetësore janë regjistruar 36 kontrolle mjekësore, pothuajse dy herë më pak krahasuar me një ditë më parë, kur ishin evidentuar 73 pacientë. Aktualisht, katër persona po trajtohen në spital, njoftoi Ministria e Shëndetësisë.
Sipas të dhënave të Ministrisë, që nga fillimi i monitorimit të situatës deri më tani janë kryer gjithsej 4.483 kontrolle të para, ndërsa shërbimet epidemiologjike kanë përpunuar 706 anketa për të përcaktuar rrethanat që lidhen me paraqitjen e rasteve të sëmundjes.
Megjithëse trendi i uljes së numrit të pacientëve të rinj vlerësohet si inkurajues, autoritetet theksojnë se institucionet shëndetësore mbeten në gjendje të shtuar gatishmërie, ndërsa mbikëqyrja epidemiologjike vazhdon pa ndërprerje.
Ndërkohë, Ministria informon se deri më 30 korrik në vend janë konfirmuar 13 raste me ethet e Nilit Perëndimor. Në Klinikën për Sëmundje Infektive janë të shtruar 10 pacientë, prej të cilëve tre ndodhen në gjendje kritike shëndetësore.
Si pjesë e masave parandaluese, gjatë natës së kaluar është realizuar një dezinsektim shtesë tokësor kundër mushkonjave, me qëllim uljen e rrezikut të përhapjes së mëtejshme të virusit. Nga Ministria e Shëndetësisë thonë se mbeten në koordinim të vazhdueshëm me të gjitha institucionet kompetente dhe paralajmërojnë se publiku do të informohet me kohë për çdo ndryshim të situatës.
