Me heshtje, qirinj të ndezur dhe 40 balona të bardhë të lëshuar drejt qiellit, Koçani pasditen e sotme u përkul në nderim të 40 jetëve të reja që humbën jetën në zjarrin në qendrën zvicerane të skijimit Kran-Montana. Tubimi paqësor, i organizuar nën moton “Dy qytete – e njëjta dhimbje”, bashkoi qytetarë të të gjitha gjeneratave në një akt të përbashkët dhembshurie dhe solidariteti.
Pa fjalime dhe pa pankarta, të pranishmit qëndruan në një atmosferë të qetë dhe dinjitoze, duke dërguar mesazhin se dhimbja nuk njeh kufij. Balonat e bardhë, të lëshuar në qiell, simbolizuan rininë që u shua shumë herët.
Veçanërisht emocional ishte momenti kur në tubim morën pjesë edhe prindërit e fëmijëve të vrarë në zjarrin e diskotekës “Puls” në Koçan. Ata theksuan se e njohin dhimbjen e familjeve në Zvicër, duke nënvizuar se humbja e një fëmije është e njëjtë, pavarësisht se ku ndodh tragjedia.
“Ndonjëherë heshtja flet më shumë se fjalët”, ishte mesazhi që, në mënyrë të heshtur, shënoi gjithë mbrëmjen.
Tubimi kaloi në mënyrë paqësore dhe dinjitoze, si një akt simbolik i bashkimit mes dy qyteteve të lidhura nga tragjedi që lanë plagë të thella dhe të përhershme.
