Zëvendësministrja e Transportit dhe Lidhjeve, Kaltrina Zekolli Shaqiri është sqaruar pas lajmit për anulimin e sheshit “Skënderbeu” faza 3, njofton Top24
“Sqarim për opinionin
Lidhur me disa shkrime mediale për gjoja anulimin e procedurës së prokurimit për projektin “Sheshi Skënderbeu faza 3, parkingu nëntokësor”, dëshirojmë t’i sqarojmë opinionit publik se bëhet fjalë ekskluzivisht për arsye teknike të vërejtura në dokumentacionin e tenderit. Gjatë verifikimit zyrtar u konstatuan mospërputhje dhe gabime të trashëguara në përllogaritje, të cilat kërkojnë korrigjim para vazhdimit të procedurës, me qëllim sigurimin e transparencës dhe respektimit të plotë të ligjit.
Për këtë arsye, është marrë vendimi për anulim teknik të procedurës, që nënkupton përmirësimin e dokumentacionit dhe rihapjen e tenderit. Theksojmë se projekti nuk anulohet. Procedura e prokurimit do të hapet sërish në ditët në vijim, ndërsa përmirësimi teknik ka për qëllim vetëm garantimin profesional dhe të qëndrueshëm”, shkruan Zekolli Shaqiri.
