LajmeSportTopLajm

Interi dhe Roma ndahen në paqe,në kampin e Contes ju duhet të vishen më trash janë -3 nga Milani

  1. Inter ngec sërish, këtë herë në transfertën e vështirë ndaj Romës në “Olimpico”, ku nuk shkoi përtej barazimit 2-2 dhe tani e sheh Milanin t’i shkëputet me 3 pikë më tepër në kreun e renditjes.

Zikaltrit e nisën vrullshëm ndeshjen dhe i shkuan pranë golit në 2-3 momente, por e para në avantazh kaloi Roma, teksa në minutën e 17’,pas një kundërsulmi të shpejtë, Pellegrini gjuajti nga distance, ndërsa topi u devijua edhe me fat në këmbët e Bastonit dhe përfundoi në rrjetë.

Që nga ai moment sfida u luajt vetëm në gjysmëfushën e verdhekuqve, teksa goli i barazimit erdhi vetëm në minutën e 56’, me Milan Skriniar që kërceu më shumë se të gjithë gjatë një këndoreje dhe dërgoi topin në rrjetën e portës së Pau Lopez.

Vetëm 7 minuta më vonë ishte anësori maroken Achraf Hakimi, që lëvizi bukur nga krahu dhe lëshoi një gjuajtje fantastike me të majtën, duke e dërguar topin në rrjetën e portës së Romës dhe duke i dhënë avantazhin Interit.

Vijojnë minutat e mira për zikaltrit, teksa Hakimi, e Vidal kanë në këmbë edhe golin e tretë, por shpërdorojnë në mënyrë të pabesueshme, ndërsa më pas është radha e trajnerit Conte që të gabojë me zëvendësimet e tij.

Largimi I lojtarëve si Lautaro, Vidal e Hakimi, për Perisic, Kolarov e Gagliardini uli ndjeshëm forcën sulmuese të zikaltërve, ndërsa nga kjo përfitoi maksimalisht Roma, që pas disa tentativave radhazi, gjeti golin në minutën e 86’ me anë të Mancinit.

Nga ai moment e deri në fund duket se të dy skuadrat u pajtuan me barazimin dhe bënë shumë pak për të provuar fitoren, ndërsa vërshëllima finale e Di Bello-s bëri që Roma e Interi të ndajnë nga një pikë dhe të ruajnë pozitat e tyre në renditje.

Artikuj të ngjashëm

Back to top button
Close
Close