Kryeministri i Kosovës, Avdullah Hoti pas takimit me të dërguarin special të BE-së për dialogun Kosovë-Serbi, Mirosllav Lajçak deklaroi sonte se Kosova në asnjë mënyrë nuk është duke e bllokuar dialogun. “Vizita e Lajçakut është në momentin e duhur për të bërë vlerësim për procesin e dialogut dhe për planet e takimeve të ardhshme. Ka tema të vështira siç është Asociacioni, të cilave do t’u qasemi sipas zotimeve që i kemi bërë para Kuvendit dhe para qytetarëve”, tha Hoti.Shefi i Qeverisë së Kosovës ka deklaruar se është dakorduar edhe me partnerët ndërkombëtarë që Kosova ulet në tavolinën e bisedimeve vetëm për marrëveshje përfundimtare për njohje reciproke.
“Kosova për herë të parë ka qasje konstruktive në dialog, dhe nuk jemi duke e bllokuar atë. Pas dy viteve të bllokadës kemi hyrë në këtë proces dhe është arrit pajtueshmëri edhe me partnerët ndërkombëtarë që të ulemi në tavolinën e bisedimeve vetëm për marrëveshje përfundimtare për normalizim të plotë të marrëdhënieve dhe njohje reciproke”, ka thënë ai.
Lajçak e filloi pasdite vizitën zyrtare në Prishtinë, ku sonte përveç me Hotin u takua edhe me kryetaren e Kuvendit të Kosovës, Vjosa Osmani.
Në këtë takim, Osmani ka thënë se çfarëdo marrëveshje, e cila nuk është e pranueshme për Kuvendin, do të mbetet e paratifikuar dhe rrjedhimisht e pazbatueshme.
Ajo theksoi nevojën për konsensus të brendshëm të Kosovës në procesin e dialogut me Serbinë.
Në këtë kontekst, ajo tha se sistemi kushtetues i Kosovës dhe unitariteti i vendit janë të pacenueshëm dhe nuk duhet të jenë pjesë e negociatave.
Osmani i ka thënë të ngarkuarit të BE-së për dialogun Kosovë-Serbi, për Asociacionin duhet të zbatohet vendimi i Gjykatës Kushtetuese të Kosovës dhe se nuk duhet lejuar bosnjëzimi i Kosovës.
Kryetarja e Kuvendit ka kërkuar nga Lajçak që BE-ja t`i bëjë presion Serbisë për t`iu zbatuar marrëveshjet e deritashme me Kosovën, sikurse edhe t`i ketë parasysh deklarimet me gjuhën e urrejtjes të një pjese të zyrtarëve shtetërorë të Serbisë.
Ajo, në veçanti ka kërkuar që BE-ja të dënojë ashpër dhe qartë deklarimet lidhur me fshehjen e varrezave masive në Serbi dhe gjithashtu të kërkojë veprime konkrete nga pala serbe për zbardhjen e fatit të të pagjeturve.
Sipas paralajmërimeve nga Brukseli, pas përfundimit të vizitës së tij në Prishtinë, të enjten, më 15 tetor, Lajçak do të zhvillojë vizitë zyrtare në Beograd.