Spitali Universitar Hamburg-Eppendorf (UKE) është i përgatitur mirë: ka shumë pemë të vjetra në oborrin e tij, ka dhe një park përballë rrugës, hardhi të egra dhe bime të tjera rriten në fasadat e ndërtesave të caktuara.

Pemët në veçanti e freskojnë mjedisin përreth duke krijuar hije, duke avulluar ujë dhe duke larguar kështu nxehtësinë nga ajri.

Bimët në fasadat e ndërtesave gjithashtu kanë një efekt ftohës sepse parandalojnë rrezet e diellit të ngrohin drejtpërdrejt muret. “Janë vendosur edhe stola nën pemë në mënyrë që pacientët e lëvizshëm, vizitorët dhe punonjësit të mund të qëndrojnë në hije”, thotë Frank Dzukowski, kreu i Departamentit të Qëndrueshmërisë së UKE. Spitali i Hamburgutzhvilloi një plan gjithëpërfshirës për mbrojtje nga nxehtësia tre vjet më parë.

Gjithnjë e më shumë ditë me nxehtësi ekstreme

Për shkak të ndryshimeve klimatike të shkaktuara nga aktiviteti njerëzor, Evropa po ngrohet veçanërisht shpejt, dhe në Gjermani ka gjithnjë e më shumë ditë me temperatura më të larta se 30 gradë Celsius.

Në vitet 1950, kishte vetëm disa ditë të tilla në shumicën e verave, dhe rreth tetë ditë me nxehtësi ekstreme ishin të mjaftueshme për ta konsideruar vitin si rekord të ngrohtë. Deri në vitet 1980, rekordi ishte dhjetë ditë të tilla. Në vitin 2000, kishte tashmë 19 prej tyre, dhe në dekadën e kaluar, vitet rekord regjistruan më shumë se 20 ditë me temperatura mbi 30 gradë.

Temperaturat e larta përbëjnë një rrezik serioz për trupin e njeriut. Veçanërisht të rrezikshme janë valët e nxehtësisë, d.m.th. periudhat kur temperaturat rriten në 30 ose më shumë gradë për disa ditë rresht, dhe nuk bien nën 20 gradë natën.

Si e dëmtojnë valët e nxehtësisë trupin

Nëse jemi të ekspozuar ndaj temperaturave të larta për një kohë shumë të gjatë, sistemi natyror i ftohjes së trupit mund të mbingarkohet, gjë që mund të shkaktojë skuqje, dhimbje në pulpa ose ënjtje të këmbëve. Nxehtësia veçanërisht ushtron një presion në sistemin kardiovaskular, dhe pasojat mund të jenë marramendje, dhimbje koke, lodhje dhe madje edhe vdekje për shkak të goditjes nga nxehtësia.

Rritja e temperaturave e kombinuar me rritjen e lagështisë, mund të çojë gjithashtu në infeksione më të shpeshta të lëkurës dhe shërim të ngadaltë të plagëve, veçanërisht nëse ndryshimi i klimës ndikon edhe në ndryshimet në shpërndarjen e baktereve. Përveç kësaj, nxehtësia mund të rrisë ose ulë efektin e disa ilaçeve.

Temperaturat e larta janë veçanërisht të rrezikshme për njerëzit mbi 65 vjeç, të sëmurët kronikë, gratë shtatzëna dhe foshnjat e fëmijët e vegjël.

Nxehtësia mbush spitalin
Vetëm gjatë dy verave jashtëzakonisht të nxehta të viteve 2018 dhe 2019 në Gjermani, rreth 15,500 njerëz vdiqën si pasojë e ekspozimit ndaj nxehtësisë. Modelet për Gjermaninë parashikojnë që deri në mesin e shekullit numri i vdekjeve shtesë të lidhura me nxehtësinë mund të kalojë 5,000 në vit.

Rregulli tashmë zbatohet: sa më shumë ditë me nxehtësi ekstreme, aq më shumë njerëz kanë nevojë për trajtim spitalor. Përveç pasojave të drejtpërdrejta të nxehtësisë, më shumë aksidente dhe ndërhyrje nga shërbimet e urgjencës regjistrohen gjithashtu gjatë ditëve shumë të nxehta.

Por lind pyetja: a janë pacientët në spitale të mbrojtur mjaftueshëm nga nxehtësia?

Në vitin 2024, Instituti Gjermani Spitalit kreu një anketë midis 289 spitaleve nëse ata kishin futur më shumë masa për mbrojtjen nga nxehtësia krahasuar me vitin e kaluar. 60 përqind u përgjigjën negativisht.

Spitalet e papërgatitura mjaftueshëm

Arsyeja kryesore pse nuk zbatohet mbrojtje më e mirë nga nxehtësianë spitale është mungesa e parave, deklaruan 96 përqind e të anketuarve. Shumë spitale dekurajohen nga masat shtesë nga barra e rëndë administrative. “Duke pasur parasysh situatën e vështirë ekonomike, shumë institucione aktualisht kanë përparësi të tjera”, thuhet në raport.

Sipas mendimit të Shoqatës Gjermane të Spitaleve (DKG), situata nuk ka ndryshuar ndjeshëm as në vitin 2026. Kjo organizatë jofitimprurëse përfaqëson interesat e spitaleve në Gjermani.

Presidenti i Bordit Drejtues të DKG-së, Gerald Gaß, kritikon faktin se shtetet federale nuk kanë përmbushur detyrimin e tyre për të financuar kostot reale të investimit të spitaleve për dekada të tëra. “Në praktikë, kjo shpesh do të thotë që spitalet preferojnë të investojnë burime të kufizuara në kujdesin shëndetësor të drejtpërdrejtë, siç është blerja e pajisjeve mjekësore ose riparimet emergjente, sesa në instalimin e sistemeve të ajrit të kondicionuar.” Prandaj, spitalet duhet të gjejnë mënyra për të ftohur ambientet e tyre me koston më të ulët të mundshme.

Spitalet kanë nevojë për më shumë para

Ka rekomandime të shumta që përfshijnë masa të lira për t’u mbrojtur nga nxehtësia, siç janë rrobat e punës më të lehta, batanijet më të holla, një dietë e përshtatur për temperaturat e larta ose instalimi i një makine uji të pijshëm.

Por, siç thekson Gaß, “mbrojtja efektive e spitalit, pacientëve dhe punonjësve të tij gjatë periudhave të nxehtësisë ekstreme kërkon investime.”

Kjo është arsyeja pse DKG po i kërkon politikës një program investimi shumëvjeçar për përshtatjen ndaj ndryshimeve klimatike me vlerë 31 miliardë euro. Një pjesë e këtyre fondeve duhet të destinohet për mbrojtjen nga nxehtësia.

Shumica e spitaleve gjermane u ndërtuan në një kohë kur periudhat e zgjatura të nxehtësisë ekstreme ishin të rralla, kështu që ato në përgjithësi nuk kanë sisteme të ajrit të kondicionuar.

Po kështu, në Spitalin Universitar në Hamburg, kondicionerët ekzistojnë vetëm në dhoma të veçanta, siç janë njësitë e kujdesit intensiv dhe sallat e operacionit, thotë Frank Dzukowski. Ndërtesa kryesore, ku ndodhen rreth gjysma e të gjithë shtretërve të pacientëve, është instaluar me mbrojtje të jashtme nga dielli.

“Kur kjo nuk është e mundur, elementë të brendshëm hijezues ose filma mbrojtës mund të instalohen në dritare për të zvogëluar depërtimin e nxehtësisë dhe rrezatimit diellor.”

Nëse është e mundur, veçanërisht pacientët rëndë të sëmurë ose të dobësuar vendosen në dhoma që ngrohen më ngadalë. Dhomat e stafit mund të ftohen pjesërisht nga ventilimi i natës.

Megjithatë, gjatë një vale të rëndë të nxehtësisë, dhoma e urgjencës ndoshta do të mbingarkohet, paralajmërojnë ekspertët. Përveç kësaj, mungesa e stafit duhet të merret në konsideratë, sepse punonjësit mund të sëmuren ose të qëndrojnë në shtëpi për t’u kujdesur për anëtarët e familjes nëse shkollat ​​ose azilet e pleqve mbyllen për shkak të nxehtësisë.

Sipas situatës aktuale, spitalet nuk do të jenë në gjendje të ofrojnë kujdes të mjaftueshëm shëndetësor gjatë një krize serioze të nxehtësisë. Kjo është arsyeja pse politika duhet të krijojë kushte të përshtatshme dhe të synojë rinovimin e spitaleve në mënyrë që t’i bëjë ato më rezistente ndaj ndryshimeve klimatike. /DW