Nëse armëpushimi prishet, kjo do të nënkuptojë se robërit izraelitë të mbajtur ende në Gaza do të mbeten në enklavë, duke shkaktuar zemërimin e shoqërisë izraelite. Pyetja tani është se ku do ta kthejnë izraelitët këtë zemërim. Sipas vëzhguesve, shkelja e armëpushimit dhe rinisja e luftës së Izraelit në Gaza mund t’i shërbejë kryeministrit Netanyahu.
Armëpushimi ndërmjet Izraelit dhe Hamasit mund t’i mbarojë koha dhe paqja mund të bëhet gjithnjë e më e largët. Kryeministri izraelit Benjamin Netanyahu konfirmoi se vendimi unanim i qeverisë ishte se “nëse Hamasi nuk i kthen pengjet deri të shtunën në mesditë”, pa specifikuar numrin, “armëpushimi do të prishet dhe IDF do t’i kthehet luftimeve intensive derisa Hamasi të mposhtet përfundimisht”. Netanyahu tha gjithashtu se “në dritën e njoftimit të Hamasit për vendimin e tij për të shkelur marrëveshjen dhe për të mos liruar pengjet tanë, mbrëmë urdhërova IDF-në të grumbullonte forcat brenda dhe rreth Rripit të Gazës”.
Sipas ushtrisë, Komanda Jugore e IF po miraton planet e betejës për Rripin e Gazës në rast se armëpushimi dhe marrëveshja e pengmarrjes me Hamasin dështon. Aktualisht, dy divizione të ushtrisë izraelite janë përgjegjëse për mbrojtjen përgjatë kufirit të Gazës dhe korridorit të Filadelfias: Divizioni 162 dhe Divizioni i Gazës . Prej mbrëmjes së djeshme, në Komandën Jugore janë vendosur disa brigada dhe njësi të forcave speciale për të përforcuar forcat ekzistuese.
SHKELJA E ARMËPUSHIMIT
Ndërkohë, udhëheqja e Hamasit tha se nuk do t’i lirojë pengjet nëse Izraeli nuk respekton kushtet e marrëveshjes së Gazës. Këtë e raporton Al Arabiya. Megjithatë, fjalët e kryeministrit izraelit mbeten të paqarta: nuk ishte menjëherë e qartë nëse ai nënkuptonte kthimin e pengjeve që do të liroheshin të shtunën apo të gjithë atyre që mbaheshin ende në enklavën palestineze. Kështu, kabineti i sigurisë “aprovoi pjesërisht” kërkesën e presidentit amerikan Donald Trump që Hamasi të lirojë të gjithë pengjet në Gaza deri të shtunën, tha një zyrtar izraelit për Ynet.
“Ne po mbështetemi në ultimatumin e presidentit amerikan dhe duam të shohim se si reagon Hamasi”, thotë zyrtari. “Meqenëse nuk ishim ne që e shkelëm marrëveshjen, por më tepër Hamasi, ka një justifikim që ana jonë të shkelë marrëveshjen. Ka një arsye pse Netanyahu nuk dha një numër pengjesh për t’u liruar deri të shtunën në deklaratën e tij të fundit”, thotë zyrtari.
RIFILLIMI I SULMEVE
Edhe Huthët e Jemenit janë të gatshëm të vazhdojnë sulmet ndaj Izraelit nëse ai rifillon sulmet në Rripin e Gazës dhe nuk respekton marrëveshjen e armëpushimit, njoftoi të martën lideri i grupit pro-iranian, Abdulmalik al-Houthi. Houthi-t kanë sulmuar Izraelin dhe anijet në Detin e Kuq, duke ndërprerë tregtinë globale. Ata pretenduan se po e bënin këtë nga solidariteti me palestinezët në Gaza gjatë ofensivës izraelite në enklavë. “Gishtat tanë janë në këmbëzën dhe ne jemi gati të përshkallëzojmë menjëherë kundër armikut izraelit nëse ai kthehet në përshkallëzim në Rripin e Gazës”, tha al-Houthi në një transmetim televiziv. Huthi, pjesë e aleancës rajonale anti-izraelite dhe antiperëndimore të njohur si ‘Boshti i Rezistencës’, kanë sulmuar edhe më parë territorin izraelit me raketa.
KËRCËNIMET E TRUMP
Ndërkohë, Trump tha se nuk besonte se Hamasi do të përmbushte afatin e së shtunës për të liruar pengjet izraelitë nga Rripi i Gazës, pasi premtoi “ferrin” nëse nuk do ta bënte. “Kam një afat të shtunën, por nuk mendoj se ata do të veprojnë para afatit,” u tha ai gazetarëve në Shtëpinë e Bardhë pasi priti mbretin Abdullah II të Jordanisë. Ky i fundit bëri të ditur se për planin amerikan për Gazën do të ketë qëndrim të bashkuar me vendet arabe.
Duke folur nga Zyra Ovale e Shtëpisë së Bardhë, mbreti tha se Jordania do të kërkojë të mbrojë interesat e saj dhe të punojë me Shtetet e Bashkuara për të sjellë paqen në rajon. Nëse armëpushimi prishet, kjo do të nënkuptojë se robërit izraelitë të mbajtur ende në Gaza do të mbeten në enklavë, duke shkaktuar zemërimin e shoqërisë izraelite. Pyetja tani është se ku do ta kthejnë izraelitët këtë zemërim. Sipas vëzhguesve, shkelja e armëpushimit dhe rinisja e luftës së Izraelit në Gaza mund t’i shërbejë kryeministrit.
