Për realizimin e projekteve strategjike nuk mjafton vetëm vendosmëria politike, por duhet të ketë edhe kornizë financiare të qëndrueshme dhe stabile, tha sot ministrja e Financave Gordana Dimitrieska-Koçoska para nënshkrimit të marrëveshjeve për financimin e ndërtimit të segmentit hekurudhor Kriva Pallankë – Deve Bair të Korridorit 8 në Qeveri.
Siç theksoi ajo, Qeveria ka një vendosmëri të qartë për realizimin e projekteve strategjike infrastrukturore.
“Sot po nënshkruajmë ndryshime në marrëveshjet e financimit dhe ndryshim në marrëveshjen e grantit për projektin ‘Ndërtimi i një segmenti të ri hekurudhor Kriva Pallankë – kufiri me Republikën e Bullgarisë si pjesë e Korridorit 8’, i cili siguron një strukturë financiare që do të mundësojë zbatimin e plotë të projektit dhe i cili jo vetëm që do të sigurojë lidhje më të mirë midis Detit Adriatik dhe Detit të Zi, por do të kontribuojë edhe në integrimin më të madh ekonomik, lëvizjen më të lehtë të njerëzve dhe mallrave, si dhe mundësi të reja për zhvillimin e ekonomisë së vendit dhe gjithë rajonit”, ka thënë ministrja Dimitrieska Koçoska.
Mjetet për zbatimin e seksionit të tretë, tha ajo, janë siguruar me mbështetjen e partnerëve tanë, Bankës Evropiane të Investimeve dhe Bankës Evropiane për Rindërtim dhe Zhvillim.
“Këto institucione për vite me radhë kanë qenë ndër mbështetësit më të rëndësishëm të projekteve të zhvillimit në vendin tonë, duke investuar në infrastrukturën e transportit, energji, furnizim me ujë dhe mbështetjen e sektorit privat. Banka Evropiane e Investimeve dhe Banka Evropiane për Rindërtim dhe Zhvillim konfirmojnë edhe një herë mbështetjen e tyre për këtë projekt, duke njohur rëndësinë e saj strategjike, si dhe angazhimin tonë për realizimin e tij të suksesshëm. Ky është një sinjal i fortë i besimit që këto institucione kanë në politikat tona dhe në vendosmërinë tonë për të përmirësuar kushtet e transportit dhe për të avancuar trafikun hekurudhor”, ka thënë ministrja.
Sipas saj, gjatë dy viteve të fundit është bërë punë intensive për të përshpejtuar dinamikën e projekteve që u trashëguan pas ngecjeve, si dhe për të nisur investime të reja që kontribuojnë në kushte më të mira të jetesës, përmirësimin e ekonomisë dhe përparimin në procesin e integrimit evropian.
“Mbështetja për projektet kapitale, përveç mjeteve të siguruara nga institucionet financiare ndërkombëtare, realizohet edhe përmes mbështetjes së fortë buxhetore. Me Rebalancin e buxhetit për vitin 2026, kemi siguruar 5.8 miliardë denarë mjete shtesë për shpenzime kapitale, pra 14.3% më shumë se fondet e planifikuara fillimisht. Ato janë një investim në konkurrueshmëri më të lartë të ekonomisë së vendit, në lidhje më të mirë rajonale, në mundësi të reja për biznes dhe në një standard më të lartë jetese për qytetarët. Mbetemi të përkushtuar në realizimin e këtyre qëllimeve, duke marrë parasysh nevojën për të ruajtur stabilitetin e financave publike. Pikërisht një qasje e tillë përmes menaxhimit të përgjegjshëm të financave publike, sigurimit të fondeve për investime kapitale dhe një partneriteti të fortë me institucionet financiare ndërkombëtare krijon bazën për rritje të qëndrueshme ekonomike, konkurrencë më të madhe dhe integrim më të shpejtë të vendit në rrjedhat evropiane të transportit dhe ekonomisë”, ka thënë Dimitrieska-Koçoska.
Në nënshkrimin e marrëveshjes morën pjesë kryeministri Hristijan Mickoski, zëvendëskryeministri dhe ministri i Transportit Aleksandar Nikolloski, ministrja e Financave Gordana Dimitrieska-Koçoska, Ben Nupnau – zëvendësshef i Delegacionit të BE-së, Fatih Turkmenoglu – drejtori i BERZH-it për Maqedoninë e Veriut, Bjorn Gabriel drejtor i BEI-t në Maqedoni, si dhe drejtori i Hekurudhave – Infrastrukturë, Sinisha Ivanovski.
