„Në momentin kur presidenti ukrainas Zelenski u shpreh se Kosova është pjesë e Serbisë, nuk mund të ketë mbështetjen tonë. Në shenjë proteste vendosa të mos vij në sesionin për pavarësinë e Ukrainës në Kuvend, as nuk do të marr pjesë në të ardhmen në ndonjë manifestim apo shënim lidhur me Ukrainën“, deklaroi deputeti Riad Shaqiri.
Deputetë shqiptarë bojkotuan shënimin e 35‑vjetorit të pavarësisë së Ukrainës dhe asnjë nga dhjetë deputetët – anëtarë të Grupit Ndërpartiak Parlamentar për mbështetje të Platformës së Krimesë, nuk ishte i pranishëm në sesionin në Kuvendin e Maqedonisë. Ata nuk ia falin presidentit ukrainas Volodimir Zelenski deklaratën e fundit gjatë vizitës në Beograd – se Ukraina respekton të drejtën ndërkombëtare dhe integritetin territorial të Serbisë, gjë që zemëroi kosovarët, pas së cilës në Prishtinë u hoq flamuri gjigant ukrainas nga një ndërtesë e lartë, simbol i mbështetjes për Ukrainën gjatë konfliktit, raporton SlobodenPecat.
Edhe pse është kryetar i Grupit Ndërpartiak, kryetari i Kuvendit Afrim Gashi nuk ishte i pranishëm në sesion, ndërsa në vend të tij fjalën hyrëse e mbajti nënkryetari i Parlamentit Antonio Miloshoski. Ambasadorja ukrainase në vend, Larisa Dir, personalisht u falënderua Gashit dhe Miloshoskit që ngjarja u mbajt në Kuvend.
Mungesa e deputetëve shqiptarë u vu re edhe nga disa ambasadorë pjesëmarrës. Nuk është e qartë nëse bëhet fjalë për bojkot të organizuar apo, siç thanë disa prej tyre, se ende janë me pushime ose nuk ishin njoftuar për sesionin.
Në Grupin Ndërpartiak Parlamentar për mbështetje të Platformës së Krimesë bëjnë pjesë 41 deputetë nga të gjitha partitë parlamentare, prej të cilëve rreth 10 janë shqiptarë ose nga komunitetet më të vogla. Nga partia VLEN përveç kryetarit të Kuvendit Gashi, nuk ishin të pranishme as Kaltrina Beqiri dhe Saranda Imeri Stafa. Nga kjo parti thanë se nuk mund ta përtypin deklaratën e Zelenskit për Kosovën, e cila u ka lënë shije të hidhur.
Zelenski në Beograd përsëriti se Kievi nuk do ta njohë pavarësinë e Kosovës.
Deputeti i Aleancës për Shqiptarët, Riad Shaqiri, konfirmoi për “Sloboden Pechat” se me qëllim e kishte bojkotuar sesionin për Ukrainën.
– Në momentin kur presidenti ukrainas Zelenski u shpreh se Kosova është pjesë e Serbisë, nuk mund të ketë mbështetjen tonë. Në shenjë proteste vendosa të mos vij në sesionin për pavarësinë e Ukrainës në Kuvend, as nuk do të marr pjesë në të ardhmen në ndonjë manifestim apo shënim lidhur me Ukrainën – tha Shaqiri.
Nga BDI nuk ishin të pranishëm koordinatorja Rina Ajdari dhe deputetët Blerim Beçeti e Diana Toska. Nuk ishte i pranishëm as Sali Murat nga partia e turqve.
Edhe deputeti i pavarur Ilir Demiri nuk ishte i pranishëm.
Sipas informacioneve nga Kuvendi, që në organizimin e ngjarjes ishte rënë dakord që Miloshoski në vend të Gashit ta drejtonte sesionin, por nuk ka informacion pse kryeparlamentari dhe kryetar i Grupit Ndërpartiak ia la këtë rol nënkryetarit Miloshoski.
Në fjalimin e tij, Miloshoski tha se Maqedonia është solidare me popullin ukrainas:
– E konsiderojmë popullin ukrainas si popull vëllazëror, por gjithashtu si pjesë të pandashme të mozaikut të popujve evropianë. Mbështetja jonë nuk është vetëm politike, ajo është mbi të gjitha njerëzore, dhe nuk është vetëm diplomatike, por edhe materiale e morale, me gjithçka që mundemi si shtet në kuadër të kapaciteteve tona t’ia japim Ukrainës në kushtet e sotme – tha Miloshoski.
Ai shtoi se paqja nuk nënkupton vetëm ndërprerje të konfliktit, por krijim kushtesh që Ukraina të mund ta ndërtojë të ardhmen e saj lirshëm dhe të sigurt.
Grupi Ndërpartiak Parlamentar për mbështetje të Platformës së Krimesë në Kuvendin e Republikës së Maqedonisë së Veriut është formuar më 7 tetor 2024, me nismë të kryetarit të Kuvendit Afrim Gashi, si forum për të gjitha iniciativat që lidhen me dimensionin parlamentar të Platformës së Krimesë, duke ngritur vetëdijen për ngjarjet në Krime dhe aneksimin e tij të paligjshëm nga Rusia.
