SHQIPËRI-Nedim Bajrami është tashmë zyrtarisht pjesë e Kombëtares shqiptare.Federata Shqiptare e Futbollit prej disa muajsh kishte nisur procedurat për të bërë të mundur aktivizimin e Bajramit me Shqipërinë por pas refuzimit të parë nga organet ndërkombëtare, Drejtoria Juridike e FSHF ju drejtua Gjykatës Ndërkombëtare të Arbitrazhit Sportiv në Lozanë.
Futbollisti i Empolit ka dashur të festojë këtë ditë të shënuar me një postim në rrjetet sociale, ku ka falënderuar tifozët për mbështetjen e njëkohësisht ka premtuar se do të japë maksimumin për ngjyrat kuqezi.
POSTIMI I NEDIM BAJRAMIT
“Më në fund, ëndrra ime, ëndrra e familjes time, ëndrra e gjyshërve të mi u bë realitet. Unë do të përfaqësoj fanellën kuqezi dhe Kombin shqiptar!
Jam shumë i gëzuar dhe dua të falënderoj pafundësisht nga thellësia e zemrës, me mijëra tifozë kuqezinj kudo nëpër botë që më kanë shkruar dhe telefonuar.
Një falënderim i veçantë shkon për FSHF që i’a doli në këtë betejë të ndërlikuar. Nga sot, përbetohem që do të jap shpirtin dhe zemrën në fushë për atë fanellë, që është krenaria e të gjithë shqiptarëve!
Shihemi së shpejti!”, shkruante Bajrami i cili pret lejen nga Empoli që t’i bashkohet Shqipërisë në grumbullimin në Poloni.
E.Ç (Dosja.al)