Bejxhan Iljas, kryetar i Partisë Demokratike Turke dhe deputet i Frontot Europian ka thënë për TV21 se mbetet pjesë e Frontit dhe se me VMRO-në është ndarë që në 2016 dhe nuk kthehet sërish.
“Në asnjë moment nuk kemi biseduar, as nuk na ka kontaktuar njeri, as nuk kemi kontaktuar askënd për të ndërruar anë, koalicionin, pra për të qenë pjesë e Qeverisë. E shoh që këto ditë ka spekulime, por ne qëndrojmë pas marrëveshjes që kemi nënshkruar me Frontin Europian dhe vazhdojmë së bashku”, tha Iljas për TV21.
Në pyetjen shtesë, nëse ai personalisht, si kandidat që ka marrë mandatin për deputet, mendon ndryshe nga partia, ai shton:
“As nuk është mendim personal, as një plan. Nuk është e drejtë politikisht. Partia nuk e ka tradhtuar kurrë partnerin politik në historinë e saj. Në vitin 2016 u larguam nga koalicioni VMRO-DPMNE dhe qëndruam në opozitë për disa muaj, duke e ditur se duhej të kontribuonim në ndryshimet që ndodhën për të qenë pjesë e Aleancës së NATO-s”, theksoi Iljas për TV21.
